Tags-Zindagi

vo kaun thā jo mirī zindagī ke daftar se
hurūf le gayā ḳhālī kitāb chhoḌ gayā

phirtī hai us ko DhūñDtī ab maut kū-ba-kū
ye zindagī to terī nigāhoñ meñ gum huī

nikle the jo bhī aaj talāsh-e-savāb meñ
vo zindagī ke saḳht azāboñ meñ kho ga.e

nahīñ mujh se 'ābid' vo kuchh ḳhaas duur
faqat zindagī darmiyāñ hai miyāñ

mujh se nazar na pher ki barham hai zindagī
mujh se nazar milā ki tabī.at udaas hai

hasīñ sub.h hasīñ shaam chāhtā huuñ maiñ
ki zindagī ko ḳhush-anjām chāhtā huuñ maiñ

vo taaza dāstāñ huuñ marne ke ba.ad un ko
aa.egā yaad merā afsāna zindagī kā

terā vajūd biitī huī zindagī kī yaad
tū aa chuke to shahr meñ dhūmeñ machā.eñ ham

isī tazād meñ muzmar hai zindagī kā fusūñ
kahīñ charāġh bujhe aur kahīñ charāġh jale

ḳhud apne hone kā inkār kar chuke haiñ ham
hamārī zindagī ab dūsre guzārte haiñ

zindagī tujh se hameñ ab koī shikva hī nahīñ
ab to vo haal hai jiine kī tamannā hī nahīñ

zindagī jin kī rifāqat pe bahut nāzāñ thī
un se bichhḌī to koī aañkh meñ aañsū bhī nahīñ

sab mujhe aarzī sā lagtā hai
tū magar zindagī sā lagtā hai

ishq meñ zindagī basar karnā
aql ko ḳhud-kushī sā lagtā hai

zindagī pyaas se mānūs na ho jaa.e kahīñ
vaqt ke dasht meñ ik lamha-e-tar aane tak

vo aa.e bhī nahīñ aur zindagī kī raat jaatī hai
sahar hotī hai aur sham-e-tamannā jhilmilātī hai

rañg 'mumtāz' chehre kā aisā khilā zindagī meñ nayā hādisa ho gayā
aa.ina aur maiñ donoñ hairān the maiñ bhī sharmā ga.ī vo bhī sharmā gayā

zindagī tere adākār the kaise ham bhī
sāmne aate rahe haiñ ka.ī kirdāroñ meñ

asbāb-e-zindagī kī har ik chiiz hai garāñ
bas ek zindagī hai ki arzāñ hai āj-kal

ġhamoñ kī dhuup meñ ummīd ke bhī saa.e huuñ
tū zindagī meñ yahī inqalāb jaisā hai