Tags-Zindagi

baḌā ḳhushnumā ye maqām hai na.ī zindagī kī talāsh kar
tū na apne zehn kī baat kar na.ī dostī kī talāsh kar

jo bahār ko bhī aziiz thī vahī shaam lutf-o-surūr kī
jise siskiyoñ kī nazar lagī usī zindagī kī talāsh kar

kaun sā vo zaḳhm-e-dil thā jo tar-o-tāza na thā
zindagī meñ itne ġham the jin kā andāza na thā

his murda thī hayāt-e-musalsal meñ ziist kī
taḳhrīb-e-zindagī ne payām-e-baqā diyā

zindagī kyā hai jo dil ho tashna-e-zauq-e-vafā
ya.anī ye parda to uTh saktā hai āsānī ke saath

zindagī bhar kā safar ho ga.ī chāhat terī
ab jahāñ tak tire qadmoñ kī sadā le jaa.e

chhoḌ ye baat mile zaḳhm kahāñ se tujh ko
zindagī itnā batā kitnā safar baaqī hai

vaqt achchhā bhī aa.egā 'nāsir'
ġham na kar zindagī paḌī hai abhī

mar ga.e jin ke chāhne vaale
un hasīnoñ kī zindagī kyā hai

zindagī tak ke haiñ rishte zindagī tak hai bahār
tum kahīñ ai 'tarz' hoge vo kahīñ marne ke baad

jab maiñ tanhā ghaT rahā thā tab kahāñ thī zindagī
dil bhī ġham se bhar chukā thā bhar chukā to tum mile

yā rab mujhe muhāl hai ranjīda zindagī
le le merī hayāt bhī merī ḳhushī ke ba.ad

lahū lahū hai badan phir bhī zindagī ke liye
mire laboñ pe koī harf-e-nā-sipās to ho

dūsrī zindagī dene kī zarūrat hī na thī
har na.ī shakl kī sūrat meñ izāla thā mirā

maiñ kisī shoḳh kī galī meñ nahīñ
zindagī merī zindagī meñ nahīñ

fursat-e-zindagī se mat pūchho
saañs bhī ham na lene paa.e the

mire āñsuoñ pe nazar na kar mirā shikva sun ke ḳhafā na ho
use zindagī kā bhī haq nahīñ jise dard-e-ishq milā na ho

kahāñ kahāñ liye phirtī hai zindagī ab tak
maiñ us jagah huuñ jahāñ dhuup hai na saaya hai

zabāñ pe ḳhud-baḳhud arz-e-mohabbat aa.ī jaatī hai
khule paḌte haiñ armāñ zindagī sharmā.ī jaatī hai

mujhe zindagī ke qarīb le ga.ī justujū
marī justujū bhalā kaun thā tujhe ilm hai