Tags-Zindagi

bāb-e-hasrat dāstān-e-shauq tasvīr-e-umīd
lamha lamha zindagī aurāq ulaTtī jaa.e hai

mirī tarah se koī hai jo zindagī apnī
tumhārī yaad ke naam intisāb kar degā

raavī kī shaam sindh kī nikhrī huī sahar
kaam aa sake to un ko mirī zindagī lage

chāhtā huuñ maiñ 'munīr' is umr ke anjām par
ek aisī zindagī jo is tarah mushkil na ho

har nafas minnat-kash-e-ālām hai
zindagī shāyad isī kā naam hai

siyāh darzoñ meñ ghaas ke zard nīm-jāñ phuul hañs rahe haiñ
maiñ apnī vīrāñ ḳhizāñ-zada zindagī se begāna ho gayā huuñ

jī to ye chāhtā hai mar jaa.eñ
zindagī ab tirī razā kyā hai

zindagī kī anjuman kā bas yahī dastūr hai
baḌh ke miliye aur mil kar duur jaate jā.iye

vo lamha jis se rañg-e-zindagī nikhrā huā sā
kabhī Thahrā huā hai to kabhī guzrā huā sā

dard aisā hai ki jī chāhe hai zinda rahiye
zindagī aisī ki mar jaane ko jī chāhe hai

dhuup meñ zindagī kī jale haiñ bahut
le chalo dosto saa.e saa.e hameñ

namak to kam nahīñ hai roz-o-shab meñ
svād-e-zindagī phīkā bahut hai

hai maut kā payām kināroñ kī zindagī
ma.asūm machhliyoñ se kaho jaal meñ na aa.eñ

bahut dānā-e-rāz aa.e hazāroñ nukta-dāñ aa.e
samajhne ke liye vo zindagī ko ġham samajhte haiñ

ham kushtagān-e-ġham pe ye ilzām-e-zindagī
be-mehr kuchh to pās-e-haqīqat zarūr thā

zindagī maut se kuchh kam na thī ai jān-e-hayāt
tere iqrār se pahle tire inkār ke ba.ad

zindagī ret ke zarrāt kī gintī thī 'nadīm'
kyā sitam hai ki adam bhī vahī sahrā niklā

isī kā naam shāyad zindagī hai
ḳhushī kī ik ghaḌī to ik ġhamī kī

zindagī har zāviye se dekhtā huuñ maiñ tujhe
hai mirī fikr-o-nazar kā dā.era phailā huā

har-nafas mujh ko aziyyat kā safar karnā paḌā
zindagī mujh se hamesha bad-gumāñ rah kar milī