Tags-Zindagi

tū kahānī hī ke parde meñ bhalī lagtī hai
zindagī terī haqīqat nahīñ dekhī jaatī

zindagī yuuñ bhī guzar hī jaatī
kyuuñ tirā rāhguzar yaad aayā

bahut hī ḳhūbsūrat zindagī hai
magar āsāñ basar karnā nahīñ hai

agar hai zindagī se pyaar 'ādil'
muhim koī bhī sar karnā nahīñ hai

dil pe jab terā tasavvur chhā gayā
zindagī kā aa.ina dhuñdlā gayā

zindagī tere tasavvur se hī mashrūt nahīñ
terī yādoñ se halākat bhī to ho saktī hai

qad-āvarī pe ham ko bahut naaz thā magar
jab zindagī kī aag se guzre to ghaT ga.e

kise zindagī hai aziiz ab kise ārzū-e-shab-e-tarab
magar ai nigār-e-vafā talab tirā e'tibār koī to ho

sar barahna shāḳhoñ par ek din vo aatā hai aur gulāb khilte haiñ
tajraba hai ye apnā ham ne bhī yahāñ āḳhir zindagī guzārī hai

bujh rahī haiñ kyoñ āñkheñ saath māh-o-anjum ke kaun sā ye sūraj hai
zindagī na chhin jaa.e aarzī sī to 'bedī' zindagī hamārī hai

navā navā meñ mirī zindagī machaltī hai
rabāb-e-husn-o-mohabbat pe naġhma-ḳhvāñ huuñ maiñ

mirā tajassus-e-paiham hai zindagī-āmoz
mujhe qarār nahīñ hai ravāñ-davāñ huuñ maiñ

fanā kī zad se hai mahfūz zindagī merī
shi.ār apnā mohabbat hai jāvedāñ huuñ maiñ

dar-guzre ham aisī zindagī se
duniyā meñ agar farāġh hai ye

zindagī sham.a kī mānind jalātā huuñ 'nadīm'
bujh to jā.ūñgā magar sub.h to kar jā.ūñgā

zindagī yuuñ hī munazzam rahe aisā bhī nahīñ
ham na.ī tarz koī aur bhī ījād kareñ

ġham hai yā ḳhushī hai tū
merī zindagī hai tū

maiñ bhī kyā kartā ki is ko bevafā honā hī thā
zindagī ko ek din mujh se judā honā hī thā

maut ke be-rahm hāthoñ ko bahāne kī talāsh
zindagī ke saath koī hādisa honā hī thā

zindagī meñ kisī ruḳh kā kisī dukh kā honā
achchhā hotā hai safar meñ koī apnā honā