Tags-Zindagi

manzileñ gum haiñ qadam Thahre hue haiñ phir bhī
zindagī ko ye gumāñ hai kī ravānī meñ huuñ maiñ

ye zindagī vo kaḌī dhuup hai 'nasīm' yahāñ
na jaane kitne hare peḌ suukh jaate haiñ

kahānī to merī kuchh thī hī nahīñ
ki merī ye zindagī to merī thī hī nahīñ

zāviya-dar-zāviya manzar badalte jā.eñge
aañkh saarī aañkh bhar ye zindagī taḌpā.egī

maut ke ba.ad ziist kī bahs meñ mubtalā the log
ham to 'sahar' guzar ga.e tohmat-e-zindagī uThā.e

isī se qarz chukā.e haiñ maiñ ne sadiyoñ ke
ye zindagī jo hamesha udhār rahtī hai

zindagī ke sab ubharte aur Dhalte zāviye
naqsh haiñ nazroñ meñ nazroñ ke badalte zāviye

koī to 'bebāk' hogī muntazir
maut ho yā zindagī ab ghar chaleñ

tū salāmat ki tirī bazm meñ ai arz-e-vatan
zindagī hai to kabhī ham bhī ġhazal-ḳhvāñ hoñge

kal hañs ke reg-e-dasht se kahtī thī zindagī
maiñ ne chhuā hī thā ki vo patthar bikhar gayā

jo shahīd-e-rāh-e-vafā hue vo isī ḳhushī meñ magan rahe
ki jo din the un kī hayāt ke ġham-e-zindagī meñ guzar ga.e

tamannāoñ kī duniyā meñ qadam dharne nahīñ detī
jo karnā chāhtā huuñ zindagī karne nahīñ detī

koī sūrat nahīñ hai zindagī se bach nikalne kī
ġham-o-ālām ke māroñ ko bhī marne nahīñ detī

kuchh aur tarah kī mushkil meñ Dālne ke liye
maiñ apnī zindagī āsān karne vaalā huuñ

tirī justujū hī mirī zindagī hai
mire naqsh-e-pā meñ har ik rahguzar meñ

honā thā zindagī hī meñ muñh shaiḳh kā siyāh
is umr meñ hai varna mazā kyā ḳhizāb kā

'jāmī' vatan meñ apne musāfir thī zindagī
london meñ bin-bulā.e hue mehmāñ se ham

mirī zindagī mirī shā.irī kisī ġham kī den hai 'jāfarī'
dil o jaañ kā qarz chukā diyā maiñ gunāhgār nahīñ gayā

tañg aa chuke haiñ kashmakash-e-zindagī se ham
Thukrā na deñ jahāñ ko kahīñ be-dilī se ham

ubhreñge ek baar abhī dil ke valvale
go dab ga.e haiñ bār-e-ġham-e-zindagī se ham