Tags-Zindagi

ibtilāoñ meñ kyā ghire 'safdar'
zindagī kī ravish hī gahnā.ī

ham bāñsurī par maut kī gaate rahe naġhma tirā
ai zindagī ai zindagī rutba rahe baalā tirā

zindagī jakḌe hue thī mire andar mujh ko
maut ke ba.ad lagā jaise ravānī meñ huuñ maiñ

darḳhur-e-sajda hai abhī aur abhī nañg-e-zindagī
ishq-e-vafā-sarisht ko ḳhuub rulā rahe ho tum

pyārī laḌkiyo patā hai ḳhudā ne tumheñ kyuuñ banāyā hai
is liye ki tum zindagī kā dāman husn-e-do-ālam se bhar do

jab dā.eroñ meñ hī kaTī hai zindagī
dil qaid se be-bāt jhulsātā hai kyuuñ

kam se kam maut se aisī mujhe ummīd nahīñ
zindagī tū ne to dhoke pe diyā hai dhoka

pattharoñ se kab talak bāñdhegī ummīd-e-vafā
zindagī dekhegī kab tak jāgtī āñkhoñ se ḳhvāb

maut ko dekhā jo apne sāmne
aaj mujh ko zindagī achchhī lagī

vaqt-e-marg ye jī meñ guzrā
zindagī apnī bejā guzrī

tere qā.ede meñ qadam kyā paḌe bas
mujhe zindagī ḳhud nishāñ de rahī hai

zindagī bhar joḌte rahnā hai in ko
TuuTī zanjīroñ se rishte de gayā vo

fitrat-e-dil dushman-e-naġhma huī jaatī hai ab
zindagī ik barq ik sho.ala huī jaatī hai ab

maiñ nazar se pī rahā thā to ye dil ne bad-duā dī
tirā haath zindagī bhar kabhī jaam tak na pahuñche

ye zindagī sazā ke sivā aur kuchh nahīñ
har saañs bad-duā ke sivā aur kuchh nahīñ

zambīl zindagī meñ baḌoñ kā diyā huā
kuchh sikka-e-duā ke sivā aur kuchh nahīñ

mirī zindagī to guzrī tire hijr ke sahāre
mirī maut ko bhī pyāre koī chāhiye bahāna

zindagī ek safar hai sach hai
ho gumāñ koī magar ho kyūñkar

zindagī kī yahī kahānī hai
saañs aanī hai aur jaanī hai

ye ruke ruke se aañsū ye dabī dabī sī aaheñ
yūñhī kab talak ḳhudāyā ġham-e-zindagī nibāheñ