Tags-Zindagi

mirā dil lagā hai jis se mirā jī gayā hai jis par
mirī kyūñ-ki zindagī ho jo usī ko maiñ na dekhūñ

mirī tujh se zindagī hai to mirā jigar hai jī hai
kise dekh kar jiyūñ phir jo tujhī ko maiñ na dekhūñ

zindagī ye to nahīñ tujh ko sañvārā hī na ho
kuchh na kuchh ham ne tirā qarz utārā hī na ho

zindagī ek ḳhalish de ke na rah jā mujh ko
dard vo de jo kisī tarah gavārā hī na ho

zindagī bhī to aarzī Thahrī
kaise kah duuñ ki zindagī ho tum

lo ki jāmid sī ġhazal bhī likh dī
aaj kuchh zindagī 'bānī' meñ na thī

zahr thā zindagī ke sāġhar meñ
rañg rañg-e-sharāb jaisā thā

tum ko mar kar bhī kahāñ marnā thā
zindagī meñ hī mare baiThe ho

kisī kitāb meñ miltā nahīñ hai zikr 'āzam'
hameñ sikhā.e haiñ is zindagī ne aise sabaq

tumhāre shahr kā insāf hai ajab insāf
idhar nigāh udhar zindagī badaltī hai

harf-e-hasrat hai tum ne kyā samjhā
zindagī dāstāñ nahīñ hotī

maut se pahle jahāñ meñ chand sāñsoñ kā azaab
zindagī jo qarz terā thā adā kar aa.e haiñ

charāġh-e-zindagī hogā farozāñ ham nahīñ hoñge
chaman meñ aa.egī fasl-e-bahārāñ ham nahīñ hoñge

rah-e-zindagī meñ maqām vo mujhe bār-hā mile dosto
ki ḳhirad kā paañv phisal gayā hai junūñ jahāñ se guzar gayā

zindagī jab se shanāsā-e-muhāllāt huī
sach to ye hai ki ḳhud apne se mulāqāt huī

zindagī hī gunāh jab Thahrī
zindagī meñ koī gunāh nahīñ

gañvā ke zaat ko laayā huuñ zindagī kī ḳhabar
mirī suno ki havāla hai mo'tabar merā

bhaTak rahā huuñ abhī zindagī ke sahrā meñ
ḳhabar nahīñ ki kahāñ ḳhatm ho safar merā

zindagī apne savāroñ ko girātī jab hai
ek mauqā bhī nahīñ detī sambhalne ke liye

jo zindagī ko ḳhud apne se bad-gumāñ kar deñ
vo hādse bhī hamārī nazar se guzre haiñ