Tags-Zindagi

ḳhvāb kī ta.abīr kā qissa nirālā ban gayā
ḳhud-farebī zindagī kā ab salīqa ban gayā

zindagī raazī nahīñ thī ġham uThāne ke liye
ham chale aa.e yahāñ tak muskurāne ke liye

zindagī naam hai ik johd-e-musalsal kā 'fanā'
rāh-rau aur bhī thak jaatā hai ārām ke baad

zindagī ham tire kūche meñ chale aa.e to haiñ
tere kūche kī havā ham se ḳhafā lagtī hai

dene vaale ye zindagī dī hai
yā mire saath dil-lagī kī hai

ham ko ma.alūm hī na thā ye raaz
maut kā naam zindagī bhī hai

log marte haiñ zindagī ke liye
ham ne mar mar ke zindagī kī hai

ye rāste to mirī hathelī ke tarjumāñ haiñ
maiñ in lakīroñ meñ zindagī kī kitāb dekhūñ

tamāshā.ī darīche meñ thiraktī surḳh ā.ankhoñ ke tilism-e-ḳhvāb meñ gum haiñ
magar sahmī huī kaTh-putliyoñ kī zindagī hai āḳhirī tamsīl kī zad meñ

mirī zindagī ke ye marhale hama-ittiqā hama-bandagī
mujhe kaif un kī nazar se hai koī vāsta nahīñ jaam se

maiñ huuñ sham-e-mahfil-e-jāvedāñ mirī zindagī nahīñ muḳhtasar
maiñ charāġh-e-rāhguzar nahīñ jo bujhā bujhā sā ho shaam se

mujhe yuuñ lagā zindagī
phir gunāhoñ kī pādāsh meñ

mujhe ye zindagī dushvār bhī qubūl magar
kahīñ kahīñ ise āsān karnā chāhtā huuñ

vaqt kī sa.ī-e-musalsal kārgar hotī ga.ī
zindagī lahza-ba-lahza muḳhtasar hotī ga.ī

ai ḳhudā-e-pāk rabb-e-zul-jalāl
zindagī ko maut ke Dar se nikāl

zindagī terā muqaddar maut hai
roz ham karte haiñ terī dekh bhaal

mere jaise shā.iroñ kī zindagī
na to maazī hai na mustaqbil na haal

zindagī meñ sab ke sab uljhe hue
zindagī hai bhī bahut mushkil savāl

zindagī ḳhatm huī bas isī hasrat meñ ki vo
mujh ko paas apne bulā.e mujhe chāhe gaahe

bas ab tamām huā intizār qāsid kā
ki zindagī kī taraf se hameñ javāb aayā