Tags-Zindagi

zindagī jiine kā pahle hausla paidā karo
sirf ūñche ḳhūbsūrat ḳhvāb mat dekhā karo

zindagī ke nām-levā maut se Darte nahīñ
hādsoñ kā ḳhauf le kar ghar se mat niklā karo

zindagī meñ kabhī kisī ko bhī
maiñ ne chāhā nahīñ magar tum ko

aa dekh zindagī tirī izzat ke vāste
zaḳhmī laboñ se ham ne tabassum luTā.e haiñ

sahrā meñ zindagī kī alāmat bhī DhūñDhnā
ham bhī ka.ī surāġh vahāñ chhoḌ aa.e haiñ

garmī-e-ranj-o-alam hī meñ basar kī ham ne
zindagī meñ to koī rut na suhānī aa.ī

thiiñ zindagī kī raah meñ dushvāriyāñ bahut
marnā kisī ke ishq meñ āsān ho gayā

kis ne tanhā.ī kī ik umr gavārā kar lī
zindagī tere tasavvur meñ miTā dī kis ne

zindagī meñ kasak zarūrī thī
ye ḳhalā pur tirī kamī se huā

ham rāz-e-dil chhupāte magar apnī zindagī
puurī khulī kitāb agar ho to kyā kareñ

zindagī bhiik meñ nahīñ miltī zindagī baḌh ke chhīnī jaatī hai
apnā haq sañg-dil zamāne se chhīn paao to koī baat bane

ham apnī zindagī se pyaar na karte to kyā karte
ye ne.amat miltī hai ik baar na karte to kyā karte

hameñ is zindagī meñ kuchh na kuchh to karnā thā 'sāhil'
mohabbat bhī agar ik baar na karte to kyā karte

saañs lene ke liye taaza havā bhejī hai
zindagī ke liye ma.asūm duā bhejī hai

nāchtī hai jumbish-e-añgusht par vo fāhisha
zindagī kah kar jise ḳhud se riyā-kārī karūñ

zindagī yuuñ huī basar tanhā
qāfila saath aur safar tanhā

kārvān-e-shauq jis ko zindagī kahte ho tum
is tag-o-dau ke jilau meñ hī sadā rahtā huuñ maiñ

phir ho sakī na merī munazzam ye zindagī
tujh se bichhaḌ ke sail ravāñ is qadar huā

muḳhtasar ye hai hamārī dāstān-e-zindagī
ik sukūn-e-dil kī ḳhātir umr bhar taḌpā kiye

zindagī dard meñ Duubī huī lai hai 'rāhī'
aise aalam meñ kise yaad rahe pyaar kī baat