Tags-Zindagi

jis zindagī ko tū ne banāyā thā zindagī
vo zindagī hai ḳhvāb-e-pareshāñ tire baġhair

kabhī jo zindagī kī be-sabātī yaad aatī hai
to sab kuchh bhuul jaatā huuñ javānī yaad rakhtā huuñ

havādis-e-roz-gār merī ḳhushī se kyā intiqām leñge
ki zindagī vo hasīn zid hai ki be-sabab muskurā rahī hai

fasāna-ḳhvāñ dekhnā shab-e-zindagī kā anjām to nahīñ hai
ki sham.a ke saath rafta rafta mujhe bhī kuchh niiñd aa rahī hai

malāl-e-hijr nahīñ ranj-e-be-ruḳhī bhī nahīñ
ki e'tibār ke qābil to zindagī bhī nahīñ

na gumān maut kā hai na ḳhayāl zindagī kā
so ye haal in dinoñ hai mire dil kī be-kasī kā

hādsoñ kī bhiiḌ hai chaltā huā ye kārvāñ
zindagī kā naam hai lāchāriyāñ majbūriyāñ

kārzār-e-zindagī meñ ḳhud ko ham ne dosto
bārhā sho.ala kiyā to bārhā shabnam kiyā

us kī hasrat dekhiye us kā kaleja dekhiye
raaz jis kī zindagī kā us ke mar jaane meñ hai

maar detī hai zindagī Thokar
zehn jab ulTe paañv chaltā hai

masrūr bhī huuñ ḳhush bhī huuñ lekin ḳhushī nahīñ
tere baġhair ziist to hai zindagī nahīñ

zindagī ne kyā diyā thā maut ne kyā le liyā
ḳhaak se paidā huā thā ḳhaak kī sohbat meñ huuñ

maiñ zindagī meñ kabhī is qadar na bhaTkā thā
ki jab zamīr mujhe rasta dikhātā thā

hamārī zindagī thī ik talāsh paanī kī
jahāñ pe ret kā 'dvij' ek chhantā dariyā thā

jise ishq kā tiir kaarī lage
use zindagī kyuuñ na bhārī lage

zindagī yuuñ bhī kabhī mujh ko sazā detī hai
ek tasvīr kitāboñ se girā detī hai

tere mai-ḳhānoñ kī ik laġhzish kā hāsil kuchh na pūchh
zindagī hai aaj tak gardish meñ paimānoñ ke saath

zindagī nazr-e-haram to ho chukī lekin 'surūr'
har aqīdat qāza-e-ālam sanam-ḳhāne ke saath

fir.aun-e-vaqt koī bhī ho sar-kashī karo
yārān-e-shahr merī tarah zindagī karo

zindagī bhar ye āsmāñ tujh ko
kisī aafat meñ mubtalā na kare