Tags-Zindagi

qat.a hotī jā rahī haiñ zindagī kī manzileñ
har nafs apnī jagah chaltī huī talvār hai

zindagī mere sañvarne ke liye
dard pahnā.e ga.ī hai mujh ko

zindagī tere taġhāful kī bhī had hai koī
is qadar naaz na kar zohra-jamāloñ kī tarah

zindagī ishq-o-mohabbat se javāñ hotī hai
varna be-kaif sī be-tāb-o-tavāñ hotī hai

uThā maiñ madrasa o ḳhānqāh se ġhamnāk
na zindagī na mohabbat na ma.arifat na nigāh

ġham dete haiñ to iztirāb na de
zindagī de magar azaab na de

bahut royā vo ham ko yaad kar ke
hamārī zindagī barbād kar ke

atā kiye haiñ yuuñ hī us ne rat-jage 'ishrat'
ye zindagī mujhe ḳhvāboñ kā silsila na lage

mujhe ab zindagī-bhar ek saaya ban ke jiinā hai
kisī aadam kī ḳhvāhish aur marzī meñ Dhalā

kyā milā ham ko zindagī ke sivā
vo bhī dushvār nā-tamām ḳharāb

zindagī kī haqīqat ajab ho ga.ī
aaj kal ho rahī hai basar ḳhvāb meñ

andhe adam vajūd ke girdāb se nikal
ye zindagī bhī ḳhvāb hai tū ḳhvāb se nikal

maiñ zahr piitā rahā zindagī ke hāthoñ se
ye aur baat hai merā badan harā na huā

aadmī kī havas kā Thikānā nahīñ lekin 'anjum' ḳhudā se yahī māñgnā
ik vafādār biivī ho bachche hoñ ghar aur kyā chāhiye zindagī ke liye

jab koī fitna-e-ayyām nahīñ hotā hai
zindagī kā baḌī mushkil se yaqīñ hotā hai

mujhe dard tū ne atā kiyā mire mehrbāñ tirā shukriya
banā dard-e-dil tirā zindagī tire dard-e-dil se hī kaam hai

zindagī ke sarāb bhī dekhūñ
niind aa.e to ḳhvāb bhī dekhūñ

zindagī meñ himāqateñ bhī karūñ
us kā phir sadd-e-bāb bhī dekhūñ

haath phir baḌh rahā hai sū-e-jām
zindagī kī udāsiyoñ ko salām

ai ajal kuchh zindagī kā haq bhī hai
zindagī terī amānat hī sahī