Tags-Zindagi

hogā tumhārā naam hī unvān-e-har-varaq
aurāq-e-zindagī ko ulaT deñ kahīñ se ham

yuuñ zindagī guzār rahā huuñ tire baġhair
jaise koī gunāh kiye jā rahā huuñ maiñ

ye mujh se sun le to rāz-e-pinhāñ salāmtī ḳhud hai dushman-e-jāñ
kahāñ se rāh-rau meñ zindagī ho ki raah jab pur-ḳhatar nahīñ hai

havā ko mauj-e-sharāb kar de fazā ko mast o ḳharāb kar de
ye zindagī ko shabāb kar de nazar tumhārī nazar nahīñ hai

paḌā hai kyā us ke dar pe 'asġhar' vo shoḳh maa.il hai imtihāñ par
subūt de zindagī kā mar kar niyāz ab kārgar nahīñ hai

maut kahte haiñ jise zabt kā ye ḳhabt na ho
zindagī par bhī hai fariyād kā dhokā ham ko

zindagī hai ik kirā.e kī ḳhushī
sūkhte tālāb kā paanī huuñ maiñ

hāsil to zindagī kā thī zindagī yahīñ kī
ab maiñ huuñ ik janāza uThvā do āstāñ se

shikast-e-zindagī kā aks ban kar rah gayā hai
vahī lamha jise shahkār karnā chāhiye thā

kisī sāñche meñ Dhal nahīñ paatī
zindagī kyoñ sambhal nahīñ paatī

ham ne bhī zindagī ko tamāshā banā diyā
us se guzar ga.e kabhī ḳhud se guzar ga.e

thā ran bhī zindagī kā ajab turfa mājrā
ya.anī uThe to paañv magar 'jaun' sar ga.e

ek shatranj-numā zindagī ke ḳhānoñ meñ
aise ham shaah jo pyādoñ ke nishāne nikle

tumheñ kyūñkar batā.eñ zindagī ko kyā samajhte haiñ
samajh lo saañs lenā ḳhud-kushī karnā samajhte haiñ

vaa.e nādāriyāñ haa.e majbūriyāñ
rasm-o-ādāb ke bas meñ hai zindagī

nahīñ ho tum to har shai ajnabī ma.alūm hotī hai
bahār-e-zindagī kāñToñ bharī ma.alūm hotī hai

jahāñ dekhā kisī ne bhī hameñ chashm-e-mohabbat se
palaT kar zindagī aa.ī huī ma.alūm hotī hai

jis ke baa.is hai zindagī be-lutf
lutf ye hai use ḳhabar hī nahīñ

girya, māyūsī, ġham-e-tark-e-vafā kuchh na rahā
zindagī rah ga.ī jiine kā mazā kuchh na rahā

kaun jītegā ye baazī mujhe ma.alūm nahīñ
zindagī meñ mujhe kyā aur use kyā mil jaa.e