Tags-Zindagi

arsa-e-rafta pe nazreñ paḌ rahī haiñ vahm kī
ḳhvāb kī tasvīr hai yā zindagī kī shaam hai

ye kaisī vaqt ne badlī hai karvaT
fareb-e-zindagī hai aur maiñ huuñ

zindagī kaT ga.ī sarāboñ meñ
ḳhud ko DhūñDā kiye kitāboñ meñ

zindagī dekh le nazar bhar ke
ham haiñ shāmil tire ḳharāboñ meñ

mumkin jahāñ nahīñ thī vahāñ kaaT dī ga.ī
kuchh din kī zindagī thī miyāñ kaaT dī ga.ī

zindagī meñ ab vo rañg-o-bū na DhūñDh
gul-adā gul-pairahan gul-rū na DhūñDh

paañv phislā to giregī vo kisī daldal meñ
zindagī maut nahīñ hai ki sambhal jā.egī

zindagī kā koī maqsad hī nahīñ hai 'āzar'
aur maiñ huuñ ki zarūrat kī tarah zinda huuñ

ajab tazād meñ kaaTā hai zindagī kā safar
laboñ pe pyaas thī bādal the sar pe chhā.e hue

haiñ mahv-e-raqs zindagī ke zāviye tabāh-kun
ye manzileñ vo rāste kisī banāv meñ nahīñ

haath kī lakīroñ se faisle nahīñ hote
azm kā bhī hissa hai zindagī banāne meñ

ab aa ga.e ho to Thahro ḳharāba-e-dil meñ
ye vo jagah hai jahāñ zindagī sañvartī hai

hai baḌā shaġhl zindagī 'aḳhtar'
pūchhte kyā ho mashġhala merā

zindagī ab aur koī ġham diyā to dekhiyo
ḳhaak kar dūñgā tujhe maiñ ye mirā va.ada rahā

tū gar nahīñ hai paas to kyā rañj mujh ko hai
ye zindagī kahāñ hai tirī dāstāñ se duur

kahīñ sar paTakte dīvāne kahīñ par jhulaste parvāne
jo ho be-shu.ūr kyā jaane ye haiñ zindagī ke afsāne

dekhiye to hote haiñ saare ham-qadam rah-rav
kāTiye to kaTtī hai rāh-e-zindagī tanhā

lafz to bāñjh haiñ jazboñ kī qadr kyā jāneñ
zindagī baar chuke hoñ to qahr kyā jāneñ

ye jo mere man meñ hai raushnī yahī zindagī yahī bandagī
mirī fikr meñ tire zikr meñ jo charāġh haiñ vo jalā piyā

ye kūche ye nīlām ghar dilkashī ke
ye luTte hue kārvāñ zindagī ke