Tags-Zindagi

maut hastī pe vo tohmat thī ki āsāñ na uThī
zindagī mujh pe vo ilzām ki mushkil se uThā

jaltī bujhtī sī rahguzar jaise
zindagī duur kā safar jaise

kahāñ se manzar sameT laa.e nazar kahāñ se udhār māñge
rivāyatoñ ko na maut aa.e to zindagī intishār māñge

varaq varaq tujhe tahrīr kartā rahtā huuñ
maiñ zindagī tirī tash.hīr kartā rahtā huuñ

ba-sad ḳhulūs mujhe zahr de gayā hai vo
ki jis se maiñ ne kahā zindagī suhānī de

naqsh-e-ummīd haiñ ban ban ke bigaḌte kyā kyā
zindagī raqs-gah-e-reg-e-ravāñ hotī hai

talḳh-tar ho zindagī to lutf de shāyad sivā
nā-shanāsāoñ kī ḳhātir āshnā DhūñDā karo

zindagī ḳhaak meñ bhī thī tire dīvāne se
ab na uTThegā bagūlā koī vīrāne se

na dil-o-dimāġh ko hai sukūñ na zamāñ makāñ ko qarār hai
maiñ safar meñ huuñ ki hazar meñ huuñ mirī zindagī safarī rahī

guzrī hai kyā maze se ḳhayāloñ meñ zindagī
duurī kā ye tilism baḌā kārgar rahā

zindagī ko dekhā hai zindagī se bhāge haiñ
raushnī ke āñchal meñ tīrgī ke dhāge haiñ

kis ḳharābī se zindagī 'fānī'
is jahān-e-ḳharāb meñ guzrī

sher hotā hai ab mahīnoñ meñ
zindagī Dhal ga.ī mashīnoñ meñ

vahī kuchh zindagī meñ zindagī kā bhed paate haiñ
jo paiham justujū karte haiñ barsoñ ġham uThāte haiñ

maiñ bolī shāhzāde mol kyā merā
vo bolā shāhzādī zindagī merī

maiñ bolī zindagī par dukh ke saa.e haiñ
vo bolā tum 'rabāb' ab har ḳhushī merī

zindagī in.ām-e-qudrat hī sahī lekin ise
kyā ġhalat samjhā agar yār-e-garāñ samjhā thā maiñ

tujh se bichhaḌ ke zindagī ho jā.egī tavīl
ehsās ke nikhār kā mausam na aa.egā

tirī ḳhushī se agar ġham meñ bhī ḳhushī na huī
vo zindagī to mohabbat kī zindagī na huī

zindagī to hameñ pasand aa.ī
ab hameñ apne ghar bhī jaane de