Tags-Zindagi

zindagī phailī huī thī shām-e-hijrāñ kī tarah
kis ko itnā hausla thā kaun jī kar dekhtā

judā hue haiñ bahut log ek tum bhī sahī
ab itnī baat pe kyā zindagī harām kareñ

vo peḌ hai zindagī kī azmat
jo tund havā se laḌ rahā hai

sāmnā zindagī se karne kā
har kisī meñ hunar nahīñ hotā

zindagī kī chāhat meñ zindagī se mat khelo
raushnī ke dīvāno raushnī se mat khelo

aap hī ne kar Daalā zindagī se begāna
aap hī to kahte the zindagī se mat khelo

zindagī soz bane saaz na hone paa.e
dil to TuuTe magar āvāz na hone paa.e

jise kahiye raqs-e-sharār-e-ġham vo agar ho shāmil-e-ġham to phir
ġham-e-dil ho yā ġham-e-zindagī ġham-e-kā.enāt se kam nahīñ

zindagī koh-e-be-sutūñ goyā
har nafas ek taisha-e-farhād

shab-e-furqat kā jab kuchh tuul kam honā nahīñ mumkin
to merī zindagī kā muḳhtasar afsāna ho jaa.e

ibārat hai shu.ūr-e-zindagī se
na ye duniyā na vo duniyā alag hai

'shakīl' duniyā meñ jis ko dekhā kuchh us kī duniyā hī aur dekhī
hazār naqqād-e-zindagī haiñ magar koī nukta-ras nahīñ hai

zindagī tamāshā hai aur is tamāshe meñ
khel ham bigāḌeñge khel ko banāne meñ

rāzdān-e-zindagī ai tarjumān-e-zindagī
hai tirā har lafz zinda dāstān-e-zindagī

hazār aish sahī zindagī ke dāman meñ
magar hai sabr kahāñ aadmī ke dāman meñ

mar ga.e sar phoḌ ke dīvār-e-zindāñ se asiir
zindagī kunj-e-qafas meñ maut se pyārī na thī

chaar din kī zindagī apne liye kaafī nahīñ
aur kuchh lamhoñ pe likh de apne mastāne kā naam

zindagī kī uljhanoñ ko taaq par rakh dījiye
zindagī hai dil kī dhaḌkan tez ho jaane kā naam

qalb o nazar kī zindagī dasht meñ sub.h kā samāñ
chashma-e-āftāb se nuur kī naddiyāñ ravāñ!

kuchh mujhe ab zindagī apnī nazar aatī nahīñ
dosto muddat huī us kī ḳhabar aatī nahīñ