Tags-Zindagi

raat din ḳhvāb buntī huī zindagī
dil meñ naqd-e-izāfī kī lau

zindagī kī raah par kaise akele ham chaleñ
is safar meñ ham-safar koī to honā chāhiye

rāstoñ par haiñ danā-dan kī sadā.eñ ḳhaufnāk
zindagī se maut goyā kar rahī hai tāk-jhāñk

ai 'sehr' qadr-dāñ jo na ho koī sher kā
to zindagī hai maut suḳhnavar ke vāste

nā vo masarrat gunāh meñ hai na vo kashish ab savāb meñ hai
ḳharāb-e-sāmān-e-zindagī sab jahāñ kī bazm-e-ḳharāb meñ hai

baḌe qalaq kī baat hai ki tum ise na paḌh sake
hamārī zindagī to ik khulī huī kitāb thī

zindagī be-dāġh bhī achchhī nahīñ
tohmateñ kuchh zindagī par dhar chalo

tujhe ab kyā kaheñ ai mehrbāñ apnā hī ronā hai
ki saarī zindagī īsār bhī karte nahīñ bantā

ek mushkil kitāb jaisī thī
zindagī ik azaab jaisī thī

tum ne dekhī nahīñ javānī meñ
zindagī āftāb jaisī thī

shabāb-e-dard mirī zindagī kī sub.h sahī
piyūñ sharāb yahāñ tak ki shaam ho jaa.e

DhūñDte phirte rahe the saaya saaya zindagī
dhuup kī galiyoñ meñ sub.h-o-shām gasht apnī hī thī

is qadar ham se jhijakne kī zarūrat kyā hai
zindagī bhar kā hai ab saath qarīb aa jaao

guzar rahī hai pareshān zindagī lekin
chale chalo ki ye rasta guzar hī jā.egā

apne niyāz-e-shauq pe thā zindagī ko naaz
ham zindagī ke naaz uThāte chale ga.e

nahā kar ḳhuun meñ kāñToñ pe aksar raqs kartā huuñ
ye mastī be-ḳhudī kī hai ye nashsha zindagī kā hai

har samt zindagī kā hai mela lagā huā
lekin har aadmī yahāñ tanhā dikhā.ī de

hai jis kī Thokaroñ meñ āb-e-zindagī 'vāmiq'
vo tishnagī kā samundar dikhā.ī detā hai

ye kyuuñ kahte ho rāh-e-ishq par chalnā hai ham ko
kaho ki zindagī se ab farāġhat chāhiye hai

zindagī ik manchale gabrū kā ruup
zindagī nau-ḳhez doshīza kā rañg