Tags-Zindagi

daa.im paḌā huā tire dar par nahīñ huuñ maiñ
ḳhaak aisī zindagī pe ki patthar nahīñ huuñ maiñ

dam-e-naz.a vo aa.e aur ziyārat ho ga.ī un kī
mukammal ho ga.ī ab zindagī kī dāstāñ shāyad

yuuñ zindagī guzar rahī hai merī
jo un kī hai vahī ḳhushī hai merī

varaq 'ḳhushtar' kitāb-e-zindagī kā
koī taaza ulaTnā chāhte haiñ

zindagī maut se behtar hai zarūr
hai musībat to musībat hī sahī

zindagī kaT to rahī hai 'nātiq'
ḳhair ġhurbat hai to ġhurbat hī sahī

aaj kā zamāna bhī vaah kyā zamāna hai
zindagī bahut mahñgī maut kitnī sastī hai

hai ye zindagī ret kā ik gharauñdā
bhalā kyuuñ havāoñ ko mehmān karte

zindagī hasratoñ ke saaz pe sahmā-sahmā
vo tarāna hai jise dil nahīñ gaanā chāhe

ye bhī kyā baat ki har saañs ho ḳhud se mansūb
zindagī naam hī karnā hai to kar auroñ ke

vo ek ġham ki sahārā thā zindagī ke liye
bhulā rahā huuñ use bhī tirī ḳhushī ke liye

zindagī kī dauḌ meñ pīchhe na rah jaa.eñ kisī se
ḳhauf-o-ḳhvāhish ke ye paikar niind meñ bhī chal rahe haiñ

ishq kī gum-shuda manziloñ meñ ga.ī
zindagī lauT kar daldaloñ meñ ga.ī

yās-o-hasrat bharī be-amāñ zindagī
aas ke reshmī āñchaloñ meñ ga.ī

tum se ho kar judā yak-nafas dosto
zindagī marghaToñ daldaloñ meñ ga.ī

tamannā maut kī radd ho ga.ī hai vaqt ke Dar se
agar maiñ zindagī māñgūñ mujhe jiine nahīñ detā

bhīgī hatheliyoñ se na paḌh kal kī zindagī
gahrī har ik lakīr sahī haath sard haiñ

kuchh zindagī kī vaj.h samajh meñ na aa sakī
sochoñ kā ik nisāb liye bhāgte rahe

har ik phuul gulshan meñ ye kah rahā hai har ik jām-e-mai se ye ham sun rahe haiñ
zamāne kī nazroñ meñ ghar hai usī kā jo hañs hañs ke din zindagī ke guzāre

ḳhayāl-e-ujrat-e-mauhūm par 'iqbāl' duniyā meñ
ye ham se zindagī ke bojh kyuuñ uThvā.e jaate haiñ