Tags-Zindagi

chāhe gar insāñ to ban saktī hai lā-fānī hayāt
zindagī insān kī go hai habāboñ kī tarah

vo chiiz jise zindagī kahte haiñ vo kyā hai
hañste hue shaffāf ḳhayālāt kā aalam

kuchh mirā ahd bhī qātil hai to kuchh bahr-e-junūñ
zindagī rakhtī hai ik hashr bapā mere saath

dard kī lahr meñ zindagī bah ga.ī
umr yuuñ kaT ga.ī hijr kī shaam meñ

mujhe bhī hairat-o-'hasrat' ne but banā Daalā
tujhe bhī zindagī aa.ī na raas darvāze

sitam ko husn-e-sitam kar gayā vahī varna
yahī thī zindagī lekin sazā sī lagtī thī

judā ho kar bhī tujh se zindagī ai dost guzregī
bahar-sūrat magar ye ḳhūbsūrat phir kahāñ hogī

aas kī raakh meñ DhūñDeñ na.ī ummīd koī
zindagī bīm-o-rajā saath liye phirtī hai

kaisī ye afsurdagī hai āj-kal
zindagī meñ kuchh kamī hai āj-kal

na ham ko ġham agar aatā mayassar
to lutf-e-zindagī jaane na hote

ik to ye zindagī hī sarāsar fareb hai
aur us pe āgahī bhī barābar fareb hai

mujh se mat kah tū hameñ kahtā thā apnī zindagī
zindagī se bhī mirā jī in dinoñ be-zār hai

ye jo chaar din kī thī zindagī ise tere naam na kar sakā
mujhe rañj hai tire shahar meñ ye safar tamām na kar sakā

jo paḌhā hai use jiinā hī nahīñ hai mumkin
zindagī ko maiñ kitāboñ se alag rakhtā huuñ

jafā ko bhī terī jo sharminda kar de
vo mazlūm maiñ zindagī chāhtā huuñ

sar-e-dār mansūr ko thī jo hāsil
maiñ 'hādī' vahī zindagī chāhtā huuñ

avval-o-āḳhir ke kuchh aurāq milte hī nahīñ
hai kitāb-e-zindagī be-ibtidā be-intihā

panāh DhūñDte guzrī hai zindagī 'kaifī'
jhulastī dhuup meñ saa.e ke ḳhvāb dekhe haiñ

aatī jaatī saañs kaise tere ġham se man ga.ī
kyā batā.eñ zindagī ḳhud-raftagī kyuuñ ban ga.ī

maiñ ne kitnī baar pūchhā tere ghar kā rāsta
zindagī kā mas.ala jis vaqt zer-e-ġhaur thā