Tags-Zindagi

baḌī ḳhvāhish hai phir se zindagī hamvār karne kī
magar us se kahīñ mismār shīrāza na ho jaa.e

ḳhushbū ke ḳhvāb meñ na Dhalī zindagī magar
chandan kī lakḌiyoñ se jalānā mirī chitā

ḳhidmat-e-ḳhalq meñ din guzāreñ zindagī is tarah se sañvāreñ
āqibat meñ mile surḳh-rūī aur yahāñ bhī na ho jag-hañsā.ī

ranj-e-duniyā fikr-e-uqbā jaane kyā kyā dil meñ hai
zindagī do din kī apnī saikḌoñ mushkil meñ hai

thā zindagī ke saaz pe chheḌā huā naġhma
be-rabt jo TuuTe hue sāzoñ meñ paḌā hai

vo jis ko khīñchne se zaat kī parteñ khuleñgī
hamārī zindagī kā vo sirā gum ho gayā hai

zindagī khiñch ga.ī mujh se tire abrū kī tarah
apne hī ḳhuun kā pyāsā huuñ lab-e-jū kī tarah

tirī zindagī bhī charāġh thī terī garm-e-ġham bhī charāġh hai
kabhī ye charāġh jalā diyā kabhī vo charāġh jalā diyā

zindagī to kyā asāsa tak nahīñ baaqī bachā
qātiloñ ne ab ke bas ḳhālī makāñ rahne diyā

ham vahī soḳhta-sāmān-e-azal haiñ ki jinheñ
zindagī duur tak aa.ī thī manāne ke liye

hayāt apnī to ḳhushk pattī se ḳhushk-tar hai
kabhī to yuuñ hogā zindagī kāmyāb likkhūñ

tasvīr-e-zindagī meñ nayā rañg bhar ga.e
vo hādse jo dil pe hamāre guzar ga.e

har shai se be-niyāz rahe jin meñ husn o ishq
ai zindagī batā ki vo lamhe kidhar ga.e

zindagī ghistī rahī 'shāhīñ' basar hone ke saath
pairahan kā rañg phīkā roz dhone se huā

husn kī mehrbāniyāñ ishq ke haq meñ zahr haiñ
husn ke ijtināb tak ishq kī zindagī samajh

hamārī zindagī parchhā.iyoñ kī ḳhāmoshī
qarīb laatī hai jo vo sadā na ham haiñ na tum

zindagī bhī yūñhī haath aatī nahīñ
us ko bhī chāhiye sar-phirā aadmī

zindagī se ye rahā apnī mulāqāt kā haal
kisī bezār se jaise koī bezār mile

zindagī ne koī ā.īna dikhāyā jab bhī
apne chehre pe hameñ maut ke āsār mile

ham tirī aarzū pe jiite haiñ
ye nahīñ hai to zindagī hī nahīñ