Tags-Zindagi

zindagī merī to gintī hai garebāñ ke shigāf
aap kyoñ dāman-e-hastī ko siye jaate haiñ

allāh jaane maut kahāñ mar ga.ī 'ḳhumār'
ab mujh ko zindagī kī zarūrat nahīñ rahī

zindagī karne lagī shahr ke halqe meñ tavāf
rāsta koh se dariyā meñ utar aayā hai

nañg-e-āshiqī hai vo nañg-e-zindagī hai vo
jis ke dil kā ā.īna terā ā.īna nahīñ

haif vo alam-nasīb jis kā dard tū na ho
uf vo dard-e-zindagī jis kī tū davā nahīñ

kin tazādāt meñ ghirā huuñ 'habīb'
zindagī hijr bhī visāl bhī hai

ho nahīñ saktā ki vo ārām le din ko kabhī
kufr hai maz.hab meñ us ke kāhilī kī zindagī

zindagī kyā maut se Dartā nahīñ mard-e-hazīñ
phir bhī is duniyā meñ koī pūchhne vaalā nahīñ

ham ne saarī zindagī ik aarzū meñ kaaT dī
farz kiije kuchh nahīñ khoyā magar paayā bhī kyā

be-mahābā tujh se aksar sāmnā hotā rahā
zindagī tū ne mujhe dekhā na ho aisā bhī kyā

koī kisī kī taraf hai koī kisī kī taraf
kahāñ hai shahr meñ ab koī zindagī kī taraf

zindagī par bhī koī zor nahīñ
dil ne har chiiz parā.ī dī hai

tum nahīñ paas koī paas nahīñ
ab mujhe zindagī kī aas nahīñ

ajiib ḳhvāhish hai shahr vāloñ se chhup chhupā kar kitāb likkhūñ
tumhāre naam apnī zindagī kī kitāb kā intisāb likkhūñ

miltī hai zindagī meñ mohabbat kabhī kabhī
hotī hai dilbaroñ kī ināyat kabhī kabhī

phir vahī be-dilī phir vahī ma.azarat
bas bahut ho chukā zindagī ma.azarat

tujh se guzrī huī zindagī maañg lī
rabb-e-imroz-o-fardā-o-dī ma.azarat

sirf ashk-o-tabassum meñ uljhe rahe
ham ne dekhā nahīñ zindagī kī taraf

maut kī raah āsān ho jā.egī
pyaar se dekhiye zindagī kī taraf

jaane āñkhoñ ne āñkhoñ se kyā kuchh kahā
zindagī jhuk ga.ī zindagī kī taraf