Tags-Zindagi

jo guzartī jā rahī hai naam us kā umr hai
zindagī hairān hai is kī ravānī dekh kar

jo tabassumoñ se ho gul-fishāñ vahī lab hañsī ko taras ga.e
hamīñ shahryār-e-hayāt the hamīñ zindagī ko taras ga.e

ye ajiib sub.h-e-bahār hai koī zindagī kī kiran nahīñ
hamīñ ḳhāliq-e-mah-o-mehr haiñ hamīñ raushnī ko taras ga.e

maiñ dasht-e-zindagī ko chalā thā nikhārne
ik qahqaha lagāyā guzartī bahār ne

zindagī ne mirā pīchhā nahīñ chhoḌā ab tak
umr bhar sar se na utrī ye balā kaisī thī

agar do-gām par manzil hai phir kyuuñ
chaTāneñ zindagī kī munfa.il haiñ

zindagī tujh se baat karnī hai
zindagī tujh se Dar gayā huuñ maiñ

mai-kade meñ zindagī hai shor-e-noshā-nosh hai
miT ga.e hote agar ham jaam o miinā dekhte

rakhte haiñ do-jahāñ meñ vahī zindagī kā haq
baḌh kar hayāt se bhī hai jin ko qazā pasand

zindagī jaise-taise kāTnī hai
kyā bhalā.ī kī kyā burā.ī kī

zindagī ko ek ma.anī de gayā
vo mujhe ik rut suhānī de gayā

usūl-e-zindagī jāñ-dāda-e-qātil samajhte haiñ
na sar ko sar samajhte haiñ na dil ko dil samajhte haiñ

zindagī ne haath se ḳhanjar na rakhā ek pal
ham qatīl-e-ġhamza-o-nāz-e-butāñ hote rahe

zindagī niiñd meñ Duube hue mandir kī tarah
ahd-e-rafta ke har ik but ko liye suutī hai

usī kā nuur virāsat hai ibn-e-ādam kī
vo zindagī jise kahte haiñ ham sahar kā charāġh

zindagī meñ aa gayā jab koī vaqt-e-imtihāñ
us ne dekhā hai 'jigar' be-iḳhtiyārāna mujhe

honā hai ġham ko ḳhāk-basar jāgte raho
miltī hai zindagī kī ḳhabar jāgte raho

apne dāman meñ chhupā le mauj-e-ġham
qatra qatra zindagī jiinā hai kyā

ḳhvāb aañsū ehtajājī zindagī
pūchhiye mat shahr-e-kalkatta hai kyā

hayāt mujh pe ik ilzām hī sahī phir bhī
bahut aziiz hai mujh ko ye zindagī phir bhī