Tags-Zindagi

zindagī ishq meñ guzre to qasīda likkhūñ
ki vahī ek qasīda tire qābil hai nā

lab-e-jāñ-baḳhsh ke mīThe kā tere jo maza paayā
to chashma zindagī kā apnī labrez-e-baqā paayā

pahle mire sahāre pe thā kār-o-bār-e-zīst
ab maiñ huuñ zindagī kā sahārā liye hue

nāsh-e-ravāñ huuñ ziist hai merī fareb-e-zīst
phirtā huuñ zindagī kā janāza liye hue

kisī kī zindagī bano ki bandagī
mire liye to mar ga.e ho ḳhush raho

zindagī ishq kī vahshat-bharā afsāna thī
mere hāthoñ meñ vo ik zahr kā paimāna thī

kho ga.ī 'pārbatī' rotī rahī 'chandrmukhī'
zindagī luTtī rahī rāh-guzāroñ meñ mirī

ye bhī shāyad zindagī kī ik adā hai dosto
jis ko sāthī mil gayā vo aur tanhā ho gayā

zindagī ho ga.ī kis tarah tū itnī sastī
kis liye tū ne bharī duniyā satā rakkhī hai

sabhī zinda haiñ aur sab kī tarah maiñ bhī huuñ zinda
magar jaise kahīñ se zindagī kam ho ga.ī hai

hai us kā da.avā ki maiñ us kī zindagī huuñ 'nāz'
vo kyā karegā kisī din agar nahīñ huī maiñ

sunā hai bujhte bujhte bhī tumhāre sard o murda lab se
ek sho.ala shola-e-yāqūt-fām o rañg o ummīd-e-faroġh-e-zindagī-āhañg lapkā thā

ḳhudā hai shāhid ki zindagī meñ vo sajda-hā-e-ġham-e-mohabbat
qazā hue the jo gāhe-gāhe ba-shart-e-fursat adā kiye haiñ

har nafs sail-e-havādis har qadam amvāj-e-ġham
zindagī is daur meñ tūfāñ hī tūfāñ ho ga.ī

jāñ-sapārī ke bhī armāñ zindagī kī aas bhī
hifz-e-nāmūs-e-alam bhī nīsh-e-ġham kā paas bhī

ban meñ vīrāñ thī nazar shahr meñ dil rotā hai
zindagī se ye mirā dūsrā samjhautā hai

ek manzil hai ek jaada hai
zindagī merī kitnī saada hai

habāb hai zindagī kā naqsha kahāñ kā din māh-o-sāl kaisā
havā hai ye dam kā kyā bharosa ummīd-e-fardā na kījiyegā

kis ke naġhme gūñjte haiñ zindagī ke saaz meñ
ik na.ī āvāz shāmil hai mirī āvāz meñ

ye zindagī ke ta.āqub meñ roz kā phirnā
agarche is tarah jiine kā hausla bhī nahīñ