Tags-Zindagi

be-mehr zindagī kā guzārā na ho sakā
ham baar baar ishq meñ haare chale ga.e

zindagī auratoñ ko detī haiñ
ghar kī chhoTī sī khiḌkiyāñ aksar

us se ummīd-e-vafā ai dil-e-nāshād na kar
zindagī apnī is armān meñ barbād na kar

faqat yaqīn pe chaltā hai zindagī kā safar
vagarna kaun hai jo Dho rahā savāl nahīñ

tirī talab terī aarzū meñ nahīñ mujhe hosh zindagī kā
jhukā huuñ yuuñ tere āstāñ par ki mujh ko ehsās-e-sar nahīñ hai

Thahrī Thahrī sī zindagī kyoñ hai
merī āñkhoñ meñ ye namī kyoñ hai

kis hasīñ ḳhvāb kā fasāna hai
zindagī dard kā tarāna hai

maut hī zindagī kī manzil hai
zindagī maut kā bahāna hai

zindagī hai koī hasīñ mahbūb
jis kā andāz qātilāna hai

zindagī hādse ke sivā kuchh nahīñ
hādse par magar sochtā kaun hai

zindagī meñ agar haiñ añdhere 'salīm'
terī ġhazloñ meñ phir chāñd sā kaun hai

ārzūoñ ne ka.ī phuul chune the lekin
zindagī ḳhār-badāmāñ hai ise kyā kahiye

shab-e-ummīd kaT ga.ī lekin
zindagī apnī muḳhtasar na huī

az-bas-ki jī hai tujh bin bezār zindagī se
behtar hai mujh ko marnā ai yaar zindagī se

mar jā.ūñ maiñ to ronā merā tamām hove
shākī haiñ merī chashm-e-ḳhūñ-bār zindagī se

us shāhid-e-nihāñ kā kushta huuñ maiñ ki jis ne
khīñchī hai darmiyāñ meñ dīvār zindagī se

marte to chhūT jaate rañj-o-mehan se yaañ ke
mānind-e-ḳhizr ham haiñ nā-chār zindagī se

yaañ kī aziyyatoñ se az-bas-ki āgahī thī
karte the ham adam meñ inkār zindagī se

jiite agar na ham to kyuuñ zillateñ uThāte
khaa.ī hai dil pe ham ne talvār zindagī se

sach hai uThā.e kab tak har ik kī be-adā.ī
aatī hai 'mus.hafī' ko ab aar zindagī se