Tags-Zindagi

havā aur dhuup kā qarnoñ purānā saath hai
aur zindagī mauj-e-ravāñ hai

mire masīhā talāsh kar dhaḌkanoñ ke jugnū
yahāñ vahāñ zindagī paḌī hai fanā se aage

maiñ ne kiyā hai apne ko ḳhud ek aa.ina
lagne lagī hai zindagī sauġhāt jān-e-man

talḳhiyāñ is meñ bahut kuchh haiñ mazā kuchh bhī nahīñ
zindagī dard-e-mohabbat ke sivā kuchh bhī nahīñ

maiñ us kī harf-gīrī kar nā paayā
vo merī zindagī kā rāzdāñ thā

tujhe pā kar tujhe khoyā hai ham ne
yahī to zindagī kā imtihāñ thā

ye jabr-e-zindagī na uThā.eñ to kyā kareñ
taḌpeñ magar taḌapne na paa.eñ to kyā kareñ

ḳhayāl-e-marg baḌī shai hai zindagī ke liye
añdherā jaise zarūrī hai raushnī ke liye

sukūñ kī bhiik na māñgeñge chashm-e-lutf se ham
gadā baneñge na do din kī zindagī ke liye

jo terī chashm-e-tavajjoh pe ho gayā qurbāñ
vo ġham bhī kitnā zarūrī thā zindagī ke liye

saheñge ġham ke liye jabr-e-zindagī lekin
nazar na ġham se bachā.eñge zindagī ke liye

bichhaḌ ke tujh se kisī dūsre pe marnā hai
ye tajraba bhī isī zindagī meñ karnā hai

is zindagī ne baḳhshe jo tohfe ajiib haiñ
pagDañDiyāñ haiñ duur tak raste ajiib haiñ

samjhe bhī koī kaise batāo use zarā
is zindagī ke kitne hī chehre ajiib haiñ

āḳhirī qist bhī sāñsoñ kī chukā degā chukāne vaalā
zindagī qarz se tere vo subuk-bār huā chāhtā hai

'dānā' mujhe azal se ġhazal kī talāsh thī
ye merī zindagī kī adā kā savāl thā

mirī mohabbat meñ saarī duniyā ko ik khilaunā banā diyā hai
ye zindagī ban ga.ī hai maañ aur mujh ko bachcha banā diyā hai

ye kyuuñ kahte ho rāh-e-ishq par chalnā hai ham ko
kaho ki zindagī se ab farāġhat chāhiye hai

zindagī āzār thī āzār hai tere baġhair
kār-e-sahl-e-marg bhī dushvār hai tere baġhair

kyā batā.ūñ kis tarah ab kaT rahī hai zindagī
merī har har saañs ik talvār hai tere baġhair