Tags-Zindagi

ek pal meñ umr-bhar kā saath chhūTā hai 'nazīr'
bad-gumānī zindagī-bhar kī kamā.ī khā ga.ī

juz fareb-e-husn aur ulfat ko 'sāqib' kyā kahūñ
zindagī se shai kabhī us par bhī dil maa.il na thā

na vo zamīñ na vo falak na ab vo kā.enāt hai
vo zindagī hī ab nahīñ na din hai vo na raat hai

mirī tarah na zindagī kisī kī yuuñ ajiib ho
nasīb maut ho agar to zindagī nasīb ho

zindagī terī atā thī varna
ham kahāñ jiine kī ḳhvāhish karte

diid ko tere aa.e the ham yaañ
zindagī kā faqat bahāna thā

ḳhud ko jab bhuul se jaate haiñ to yuuñ lagtā hai
zindagī tere azāboñ se nikal aa.e haiñ

koī kañghī na milī jis se sulajh paatī vo
zindagī uljhī rahī bramhā ke darshan kī tarah

ba.ad marne ke ghar nasīb huā
zindagī ne to kuchh diyā hī nahīñ

maiñ zindagī huuñ zindagī ye hai mirā nām-o-nishāñ
jumbish dah-e-barg-o-samar

sulh jis se rahī merī tā-zindagī
us kā saare zamāne se jhagḌā sā thā

tere pahlū meñ jī rahī thī kabhī
zindagī merī zindagī thī kabhī

yaad hogā abhī talak tujh ko
maiñ bhī terī hī zindagī thī kabhī

āzādī merī ruuh ko dilvā.egī ajal
kab tak rakhegī zindagī apne hisār meñ

ḳharāsh-e-zehn bhī hai zīnat-e-nigāh bhī hai
ye zindagī ḳhas-o-ḳhāshāk bhī nagīna bhī

ye vaqt zindagī kī adā.eñ bhī le gayā
qisse kahāniyoñ kī sabhā.eñ bhī le gayā

jise tū ne samjhā hai zindagī usī inqalāb kā naam hai
kabhī din huā kabhī shab huī kabhī sub.h hai kabhī shaam hai

maiñ 'sābir' zindagī ke saare manzar
pas-e-girdāb likhnā chāhtā huuñ

zindagī itnī pareshāñ hai ye sochā bhī na thā
us ke atrāf meñ sholoñ kā samundar dekhā

ye zindagī ke bayābāñ meñ dhuup kā sahrā
kahāñ qayām karūñ koī sā.ebāñ to mile