Tags-Zindagi

dil meñ umañg aur irāda koī to ho
be-kaif zindagī meñ tamāshā koī to ho

zindagī aur pur-asrār huī jaatī hai
ishq kā saath na hotā to shikāyat bhī na thī

ham to jis mahfil meñ baiThe shaġhl-e-nāv-nosh thā
zindagī meñ maut bhī aa.egī kis ko hosh thā

koī tūfāñ to nahīñ koī talātum to nahīñ
zindagī naam hai jis kā vo kahīñ tum to nahīñ

ye koī baat hai utnī phailī huī zindagī meñ faqat ik tirā intizār
muntazir to tire ham raheñge magar kaise kaise hamāre safar jā.eñge

kār-e-duniyā kareñ kuchh adāvat to ho Tuk tabī.at badalne kī sūrat to ho
ham agar ḳhud se laḌte-jhagaḌte rahe zindagī ke anāsir bikhar jā.eñge

zindagī-bhar kā hai ahbāb se is dasht meñ saath
misl-e-jāñ rahte haiñ ham 'arsh' jahāñ rahte haiñ

savāl ban ke rū-ba-rū khaḌī huī thī zindagī
mirā lahū nichoḌ kar javāb koī le gayā

surḳh aahan par Tapaktī buuñd hai ab har ḳhushī
zindagī ne yuuñ to pahle ham ko tarsāyā na thā

zindagī hai ki kisī shaah kī begam jis ko
vaqt bāzār meñ laayā hai barhana kar ke

jo hurūf likh gayā thā mirī aarzū kā bachpan
unheñ dho sake na dil se mirī zindagī ke sāvan

yaqīñ mujhe bhī hai vo ā.eñge zarūr magar
vafā karegī kahāñ tak ki zindagī hī to hai

zindagī meñ har tarah ke log milte haiñ 'shu.ūr'
āshnā-e-dard-e-dil nā-āshnā-e-dard-e-dil

dasht mujh ko bulātā hai
zindagī ab ḳhudā-hāfiz

sapne talāsh karte rahe zindagī meñ ham
ik ret kī nadī meñ sadaf dekhte rahe

zindagī apnī thī goyā lamha-e-furqat kā tuul
kuchh maze ham ne bhī umr-e-jāvedānī ke liye

do kināre hoñ to sail-e-znidagī dariyā bane
ek had lāzim hai paanī kī ravānī ke liye

DhūñDhtī phirtī thī jis ko zindagī
maut ke pahlū meñ soyā mil gayā

kahīñ to ho jahāñ bachche hī sirf rahte hoñ
kisī ilāqe meñ bhī zindagī nahīñ puurī

ḳhud jis meñ kuchh na paayā na auroñ ko kuchh diyā
fil-asl aisī zindagī bekār hī to hai