Tags-Zindan

sunsān hai zindāñ bhī bisān-e-dil-e-shā.er
ne shor-e-salāsil hai na hañgāma-e-fariyād

zindagī jism ke zindāñ meñ ye sāñsoñ kī salīb
ham se toḌī nahīñ jaatī hai magar TūTtī hai

asīroñ kā nahīñ kuchh shor-o-ġhul ye aaj zindāñ meñ
mire dīvāna-pan ko dekh kar zanjīr hañstī hai

zindāñ zindāñ shor-e-anal-haq mahfil mahfil qul-qul-e-mai
ḳhūn-e-tamannā dariyā dariyā dariyā dariyā dariyā aish kī lahr

haiñ saḳhtiyāñ baḌhī huī zindāñ meñ āj-kal
do-gām chalnā bhī mujhe dushvār kar diyā

vahshat-e-dil kī nahīñ tadbīr juz afsurdagī
tañgī-e-zindāñ kisī pahlū se dīvāne meñ aa

phailā fazā meñ naġhma-e-zanjīr-e-marhabā
zindāñ meñ ghuT ke rah na sakī zindagī kī baat

ḳhvāboñ kī havelī se ravāñ shor-e-musalsal
āvāz-e-jaras ke liye zindāñ nahīñ hote

yuuñ qaid-e-zindagī ne rakhā muztarib hameñ
jaise hue hoñ dāḳhil-e-zindāñ na.e na.e

rafta rafta yahī zindāñ meñ badal jaate haiñ
ab kisī shahr kī buniyād na Daalī jaa.e

ḳhūgar-e-qaid-e-vafā par khul chukā zindāñ kā raaz
jurm thī vo qaid ye us jurm kī tāzīr hai

shukriya ai mausam-e-gul pās-e-vahshat hai yahī
gulsitāñ ko tū ne ham-dīvār-e-zindāñ kar diyā

josh-e-vahshat meñ jo lī zindāñ se maiñ ne rāh-e-dasht
kūd-kāñ mujh ko ḳhudā-hāfiz pukāre shahr se

mausam-e-gul meñ rahā zindāñ meñ aur aa.ī na maut
sāmne hotī nahīñ hai aañkh saare shahr se

shaiḳh jī majma-e-zindāñ meñ nasīhat kaisī
kaun suntā hai yahāñ qibla-e-hājāt kī baat

jaane zindāñ meñ kyā kahā us ne
jis kā kal raat intiqāl huā

lahū ke daaġh baḌh jā.eñge kuchh dīvār-e-zindāñ par
ḳhafā ho jā.egā zindāñ se dīvāna to kyā hogā

jaane zindāñ ke dar-o-bām kā andāz hai kyā
na.ara-zan aa.e jo akasr ga.e ḳhāmoshī se

zindāñ meñ koī rauzan-e-zindāñ to ho ki log
jis haal meñ bhī dekheñ hameñ zinda kah sakeñ

zikr hai zindāñ meñ vo gulzār par bijlī girī
aaj mere āshiyāñ meñ raushnī ho jā.egī