Tags-Zindan

zindāñ meñ ḳhayāl itnā ai dast-e-junūñ rakhnā
tā-umr asīrī hai aur ek garebāñ hai

ham vahshiyoñ kā maskan kyā pūchhtā hai zālim
sahrā hai to sahrā hai zindāñ hai to zindāñ hai

band hai jis ḳhāna-e-zindāñ meñ dīvāna terā
us kā darvāza parī-rū roz o shab khultā nahīñ

lag ke zindāñ kī salāḳhoñ se mujhe vo dekh le
koī ye paiġhām merā us talak pahuñchā.e bhī

ghar ke zindāñ se use fursat mile to aa.e bhī
jāñ-fazā bātoñ se aa ke merā dil bahlā.e bhī

haiñ halqa-e-zanjīr kā ham ḳhanda-e-jāved
zindāñ meñ basā.e hue ik shahr-e-tarab haiñ

hijāb-e-tan kasād-e-raunaq-e-kālā-e-yūsuf hai
taraddud kyā hai zindāñ-ḳhāna-e-hijrāñ se hijrat kā

toḌ degī ye javāñ fikr hisār-e-zindāñ
jaag uTThe haiñ mire des ke bekas insāñ

ye jo zindāñ meñ tumheñ saa.e nazar aate haiñ
ye kabhī raunaq-e-darbār huā karte the

koī tasavvur-e-zindāñ bhī ab nahīñ baaqī
ham us zamāne ke sab dostoñ ko chhoḌ chuke

jis bastī meñ sab vāqif hoñ vo bastī ik zindāñ hai
vahshat kī fasl aa.egī to ham kitnā ghabrā.eñge

hanūz ik partav-e-naqsh-e-ḳhayāl-e-yār baaqī hai
dil-e-afsurda goyā hujra hai yūsuf ke zindāñ kā

kaun pāband-e-junūñ fasl-e-bahārāñ meñ na thā
is baras nañg-e-javānī thā jo zindāñ meñ na thā

haq baat pe koḌe aur zindāñ bātil ke shikanje meñ hai ye jaañ
insāñ haiñ ki sahme baiThe haiñ ḳhuñḳhār darinde haiñ raqsāñ

arsa-e-qaid-e-hayāt ab vahshiyoñ par tañg hai
chaar dīvār-e-anāsir mil ke zindāñ ho ga.iiñ

phir ye kis ne apnā kah kar dī hai sadā ik vahshī ko
zindāñ jis ke shor se larzā paañv paḌī zanjīreñ haiñ

dīvār-e-zindāñ ke pīchhe
jurm-e-mohabbat meñ baiThā huuñ

jo qaidī-e-mehan the 'jamīla' vo chal base
zindāñ meñ koī sāhab-e-zindāñ nahīñ rahā

har shaḳhs apne apne ġhamoñ meñ hai mubtalā
zindāñ meñ apne saath rulā.eñ kisī ko kyā

ġham-e-hāsil muqayyad kar rahā hai sa.ī-e-hāsil ko
mazāq-e-ārzū dīvār-e-zindāñ hai jahāñ maiñ huuñ