Tags-Zindan

ban gayā qaid kā farmān bhī rāhat kī naved
hue tārīkī-e-zindāñ meñ tire baal saped

dīvār se go iiñT khisak kar paḌī sar par
sad-shukr ki rauzan koī zindāñ meñ khulā hai

habs ke aalam meñ mahbas kī fazā bhī kam nahīñ
rauzan-e-dīvār-e-zindāñ kī havā bhī kam nahīñ

koī dekhe mirī āñkhoñ se asīrī kā fusūñ
ghar huā jaatā hai ik halqa-e-zindāñ jānāñ

le jaa.e mujhe sū-e-chaman ab na bahārāñ
dil qismat-e-zindāñ kī qasam khaa.e hue hai

shabnamī haath baḌhā.ūñ ki khule darvāza
bin khile phuul ke zindāñ meñ huuñ ḳhushbū kī tarah

kab se qaid huuñ
chalte-phirte zindāñ meñ

haal ke zindāñ se bāhar kuchh nahīñ juz rūd-e-marg
aur is zindāñ meñ juz zanjīr-e-pā kuchh bhī nahīñ

tauq-o-rasan ko naam diyā zulf dost kā
zindāñ ko sāya-e-mizha-e-yār kah ga.e

pā-e-āzād hai zindāñ ke chalan se bāhar
beḌiyāñ kyuuñ koī dīvāna pahnātā hai mujhe

dharī rah jā.egī pābandī-e-zindāñ jo ab chheḌā
ye darbānoñ ko samjhā do ki dīvāne bahut se haiñ

zanjīroñ kā bojh liye haiñ be-dīvār ke zindāñ meñ
phir bhī kuchh āvāz nahīñ hai kaise ye dīvāne haiñ

ye bastī hai ki zindāñ kuchh bhī to palle nahīñ paḌtā
the kab pachhuā ke din aur kab se purvā.ī safar meñ hai

gūñjegā har ik halqa-e-zanjīr-e-asīrāñ
ḳhāmoshī-e-zindāñ kī aziyyat hai sahar tak

zindāñ ahl-e-junūñ ko shāyad raas aa gayā
dīvāroñ meñ dar nahīñ dekhā bahut dinoñ se

paidā yahīñ se merā nasheman bhī ho to jaa.e
be-e'tibārī-e-ġham-e-zindāñ ko kyā karūñ

zindāñ meñ bhī shorish na ga.ī apne junūñ kī
ab sañg mudāvā hai is āshufta-sarī kā

baḌe ḳhatre meñ hai husn-e-gulistāñ ham na kahte the
chaman tak aa ga.ī dīvār-e-zindāñ ham na kahte the

dīvāne tere Duub ga.e gahrī niiñd meñ
zindāñ meñ shor-e-tauq-o-salāsil nahīñ rahā

tū phail gayā tā-ba-ufuq mujh se bichhaḌ kar
maiñ jism ke zindāñ meñ tujhe DhūñDh rahā thā