Tags-Zindan

asīroñ kā nahīñ kuchh shor-o-ġhul ye aaj zindāñ meñ
mire dīvāna-pan ko dekh kar zanjīr hañstī hai

zindāñ se āñkheñ señkne us gul ke ghar ga.e
dozaḳh se aag lene chale ham bahisht meñ

'mus.hafī' jā ke gulistāñ meñ kare kyā pyāre
ki gulistāñ hai use ḳhāna-e-zindāñ tujh bin

dar-e-zindāñ se chhuT kar bhī vahī hai silsila ya.anī
ki ik zanjīr TuuTī laakh zanjīreñ nazar aa.iiñ

kyuuñ hue qatl ham par ye ilzām hai qatl jis ne kiyā hai vahī mudda.ī
qāzī-e-vaqt ne faisla de diyā laash ko nazr-e-zindāñ kiyā jā.egā

ghar meñ dil phir mirā ghabrāne lagā aap se aap
ai junūñ phir ye makāñ ḳhāna-e-zindāñ hogā

aayā hai hamāre mulk meñ bhī ik daur-e-zuleḳhā.ī yaanī
ab vo ġham-e-zindāñ dete haiñ jin ko ġham-e-zindāñ honā thā

zindāñ kī dil-shikasta tanhā.iyoñ meñ koī
dīvār-o-dar se jaane kyā guftugū kare hai

zanjīr kī tañgī thī asīrān-e-vafā the
āvāz bhī zindāñ se na jhankār kī niklī

tire hirmāñ-nasīboñ kī bhī kyā taqdīr hai saaqī
ba-har-sūrat vahī zindāñ vahī zanjīr hai saaqī

shahr ho bayābāñ ho daar ho ki zindāñ ho
naġhme zindagī hī ke gaa.e chār-sū ham ne

dekh zindāñ se pare rañg-e-chaman josh-e-bahār
raqs karnā hai to phir paañv kī zanjīr na dekh

allāh re qaid-ḳhāna-e-hastī ki dam ke saath
har ik qadam pe lākhoñ haiñ zindāñ lage hue

ḳhud maiñ zindāñ meñ huuñ tīrgī ke
harf dūñgā yūñhī raushnī ke

zindāñ koī qarīb nahīñ aur na raqs-gāh
sunte haiñ ik ajiib sī jhankār sab ke sab

sirf zindāñ kī hikāyat hī pe ma.amūr nahīñ
ek tārīḳh safar kartī hai zanjīr ke saath

hai chaman meñ āmad-e-fasl-e-bahār
ab dar-e-zindāñ ko toḌā chāhiye

dard uTh uTh ke ye kahtā hai rag-e-jāñ ke qarīb
abhī zindāñ meñ huuñ lekin dar-e-zindāñ ke qarīb

zindāñ kī baat daar ke charche rasan kā zikr
kitnī ajab hai tab-e-rasā sochnā paḌā

qaid ho kar aur bhī zindāñ meñ uḌtā hai ḳhayāl
raqs zanjīroñ meñ bhī karte haiñ āzādāna ham