Tags-Zulf

jab ki le zulf tirī mus.haf-e-ruḳh kā bosa
phir yahāñ farq ho hindū o musalmān meñ kyā

kyā chukā bū hai zulf meñ terī
aarsī jis kuuñ dekh chakrat hai

tañg hai 'shād' mire zauq kī vus.at ke liye
halqa-e-zulf hai āfāq kā gherā kyā hai

nik.hat-e-zulf jab se aa.ī hai
nahīñ miltā hameñ dimāġh apnā

apne māroñ ko mat pareshāñ kar
zulf-e-mushkīñ kuuñ pech-o-tāb na de

'ramz' vo kāfir zulf-e-muattar
dil kā mire īmān to hogī

bār-e-haft-aflāk bhī is nā-tavāñ shāne pe hai
zulf se kahnā ki āhista sar-e-shāna khule

maiñ apnī zaat meñ mahbūs ho ke baiTh rahā
bikhartā kaash tirī zulf-e-ambarīñ kī tarah

huā hai zulf se gustāḳh kis qadar shāna
hamāre paas bhī dast-e-burīda honā thā

javānī kī siyah-mastī meñ vasf-e-zulf likkhā thā
baḌhā vo silsila aisā ki ham mushkīñ qalam Thahre

dekhoge chashm-e-nargis-e-jādū ba-kām-e-dil
dekhoge zulf tā-ba-kamar jāgte raho

tire hai zulf o ruḳh kī diid sub.h-o-shām āshiq kā
yahī hai kufr āshiq kā yahī islām āshiq kā

bā.is-e-tīra-baḳhti-e-ālam
us kī zulf-e-siyāh se pūchho

dil-e-'bedār' ko to luuT liyā
zulf hai yā koī balā hai ye

kyā lams thā kyā zulf thī kyā surḳhī-e-lab thī
har rañg tirā jaise sharāboñ kī tarah thā

ruḳh-e-raushan pe safā loT ga.ī
zulf par kaalī balā loT ga.ī

ishq kī hai ḳhud-numā.ī ishq kī āshuftagī
rū-e-tābāñ kuchh nahīñ zulf-e-pareshāñ kuchh nahīñ

base to mere mashām-e-jāñ meñ mahak tire nāma-e-nafas kī
khule to parcham kabhī mire dosh par tirī zulf-e-mushkbū kā

zulf-e-ambar-bār ke qisse sunā.eñ
turra-e-tarrār kī bāteñ kareñ

aao husn-e-yār kī bāteñ kareñ
zulf kī ruḳhsār kī bāteñ kareñ