Tags-Zulf

hai jazb-e-dil durust to chāh-e-firāq se
khīñchegī terī zulf shikan-dar-shikan mujhe

jā jā ke bahut zulf ke kūche meñ aḌe phuul
lekin na kabhī kaan ke patte se laḌe phuul

barsāt kā ik ḳhvāb hai mustaqbil-e-tārīk
bikhrī huī sī zulf-e-girah-gīr kisī kī

tujh zulf ke halqe meñ hai dil be-sar o be-pā
Tuk mehr karo haal upar be-sar-o-pā ke

zulf kī aaḌ meñ thī jān-e-nazar kī sūrat
raat guzrī to nazar aa.ī sahar kī sūrat

na faqat tumhārī nigāh ne mire dil ko haath se le liyā
ki tumhārī zulf-e-darāz ne mujhe sau balā meñ phañsā diyā

maiñ sar-e-mū nahīñ juuñ zulf kisī se shākī
bāda-dastī ne kiyā merī pareshāñ mujh ko

tasvīr tū us kī zulf kī dekh
naqqāsh ye chiin kā qalam hai

kaise shāne ke daañt paḌte haiñ
hai jo vo zulf mushk-e-nāb lazīz

bus ki ab zulf kā saudā bhī mire sar meñ nahīñ
kyā karūñ maañg ke us ko jo muqaddar meñ nahīñ

ab ye shikva hai vo pahlī sī ghaTā.eñ hī nahīñ
ham na kahte the na kar zulf-e-pareshāñ dekhā

kab talak galiyoñ meñ saudā.ī se phirte rahiye
dil ko us zulf-e-musalsal se lagā baiTheñge

bikhere zulf ruḳh par kaun ye bālā-e-bām aayā
ḳhayāloñ kī fazā mahkī bahāroñ kā payām aayā

zindagī ġham se ulajhtī hī rahegī hamdam
vaqt kī zulf girah-gīr sulajh jaane tak

mauj-e-mai bal khā ga.ī gul ko jamā.ī aa ga.ī
zulf ko dekhā jo us aariz pe lahrāte hue

ḳhayāl-e-zulf-e-dotā meñ 'nasīr' piiTā kar
gayā hai saañp nikal tū lakīr piiTā kar

nigah niklī na dil kī chor zulf-e-ambarīñ niklī
idhar lā haath muTThī khol ye chorī yahīñ niklī

zulf-e-mushkīn-e-yār qahrī hai
kyā qayāmat kā naag zahrī hai

vo zulf-e-pur-pech-o-ḳham hai us kī phañsā to niklegā phir na hargiz
hamārā kahnā hai sach are jī tū kaam us se na Daal dil kā

phir bū-e-zulf-e-yār ne aa kar sitam kiyā
phir chal diyā mujhe dil-e-dīvāna chhoḌ kar