Tags-Zulf

aarzū hai ki zulf kuuñ khole
maiñ ne kaalī rayan nahīñ dekhā

zulf terī huī kamand mujhe
is meñ bāñdhā hai band band mujhe

tujh zulf meñ dil ne gum kiyā raah
is prem galī kuuñ intihā na.iiñ

hai phañsā jo zulf meñ us ke dil to batā deñ kyā tujhe ham-nashīñ
kabhī bal se bal kabhī ḳham se ḳham kabhī tāb-chīn se taab hai

sarv ko dekh ke kahtā hai dil-e-basta-e-zulf
ham giraftār haiñ is baaġh meñ āzād haiñ sab

balā hai raah bahkāne kuuñ ye zulf
gayā hai biich us ke dekh marġhol

tishnagī tishnagī! are tauba
zulf lahrāo! vaqt nāzuk hai

nahīñ havā meñ ye bū nāfa-e-ḳhutan kī sī
lapaT hai ye to kisī zulf-e-pur-shikan kī sī

suljhā.e terī zulf-e-pareshāñ ke bal magar
qaa.em nizām-e-ālam-e-imkāñ na ho sakā

apne hāthoñ kī lakīroñ meñ nahīñ hai shāyad
haa.e vo zulf jo khul jaa.e muqaddar kī tarah

aane se fauj-e-ḳhat ke na ho dil ko muḳhlisī
bañdhuā hai zulf kā ye chhuTāyā na jā.egā

TūTeñ vo sar jis meñ terī zulf kā saudā nahīñ
phūTeñ vo āñkheñ ki jin ko diid kā lapkā nahīñ

jo ma.ashūq-e-zulf-e-dotā bāñdhte haiñ
mire sar se kaalī balā bāñdhte haiñ

roz-e-mahshar jo bulā.e ga.e dīvāna-e-zulf
beḌiyāñ pahne hue shor machāte aa.e

dekho ki phañs na jaa.eñ farishte bhī jaal meñ
kyuuñ paḌh rahe ho khol ke zulf-e-rasā namāz

koī jab chheḌtā hai qissa-e-dār-o-rasan 'qaisar'
to dīvānoñ ko un kī zulf ke ḳham yaad aatā hai

ye kyuuñ ḳhamīda hai sifat-e-sāhab-e-rukū
kyā paḌh rahī hai dosh pe zulf-e-dotā namāz

sitāroñ ke aage jo ābādiyāñ haiñ
tirī zulf kī gum-shuda vādiyāñ haiñ

phailā phailā aañkh meñ kājal
uljhā uljhā zulf kā bādal

hijrāñ kī raat mashġhala-e-dil se pūchhiye
us zulf-e-ḳham-ba-ḳham kī girah kholtā rahā