Tags-Zulf

jab us kī zulf meñ pahlā safed baal aayā
tab us ko pahlī mulāqāt kā ḳhayāl aayā

riish yāqūb ne rakkhī hai ruḳh-e-yūsuf par
chashm-e-bad-dūr ki hai zulf-e-zuleḳhā sehrā

zulf o ruḳh donoñ haiñ jaane se javānī ke ḳharāb
mushk vo mushk na kāfūr vo kāfūr rahā

har sher meñ zulf kī hai tārīf
is bahr meñ mauj-āshnā huuñ

na thā mere jañgal meñ āzād koī
bagūle bhī pāband-e-zulf-e-havā the

kartā huuñ terī zulf se dil kā mubādala
har-chand jāntā huuñ ye saudā burā nahīñ

uqda jo dil meñ hai mire hone kā vā nahīñ
jab tak ki aap kholte zulf-e-dotā nahīñ

tum chehra apnā dikhlā do kuchh rāh-e-ḳhalāsī batlā do
ik zulf kā saudā sar meñ hai ik kaalī balā ne gherā hai

jab raat kī zulf bhīgtī hai
sannāTe kī tarah gūñjtā huuñ

nazzāra-e-jamāl mayassar ho kis tarah
aa.e haiñ aap zulf pareshāñ kiye hue

jaur-e-zulf kī taqrīr pech-tāb-e-ḳhāmoshī
hind meñ 'asad' nālāñ naala dar safāhāñ hai

zulf kī ḳhushbū shagufta lab 'kañval'
manzar-e-pur-kaif dikhlāne lagā

gir ke us ke kūcha-e-tārīk meñ niklā na dil
pech-e-zulf-e-yār kā mujh ko aḌañgā ho gayā

'hātim' us zulf kī taraf mat dekh
jaan kar kyuuñ balā meñ phañstā hai

girnī thī ham pe barq-e-tajallī na tuur par
dete haiñ baada zarf-e-qadah-ḳhvār dekh kar

ai kaash na hotā ye asar āh-e-rasā meñ
ik barhamī aatī hai nazar zulf-e-dotā meñ

chaudhvīñ-rāt tirī zulf meñ Dhal jaatī hai
chaḌhtā sūraj tire ruḳhsār se jā miltā hai

har har nigāh sāġhar-o-mīnā uThā.egī
zulf-e-hayāt shauq se parcham uḌā.egī

dil ko khīñche hai tirī zulf-e-siyāh
sehr jaadū kī balā tujh meñ hai

na jaane 'zeb' dil-e-zār kyuuñ taḌap uTThā
havā-e-sub.h thī ḳhushbū-e-zulf-e-yār na thī