Tags-Zulf

kaam ban jaa.e agar zulf-e-junūñ ban jaa.e
is liye is ko sañvāro ki sañvāre jaao

pur haiñ mushk-e-tīr-baḳhtī se mirī sab dil ke ghaav
jis tarah laTke hai zulf-e-dil-barāñ shānoñ ke beach

halqa-e-bād-e-sabā tazkira-e-zulf-e-sanam
is meñ kuchh shā.eba-e-zauq-e-junūñ hai ki nahīñ

zulf-e-mushkīñ thī mehrbāñ kis kī
bū basī hai dimāġh meñ ab tak

suulī chaḌhe jo yaar ke qad par fidā na ho
phāñsī chaḌhe jo qaidī-e-zulf-e-rasā na ho

dil se andāz-e-shikan zulf ne sab jam.a kiye
chheḌ kar us ko kahīñ tū na pareshāñ honā

agarche dekhe haiñ zulf-o-lab ke hasīn sapne to kyā ġhalat hai
nazar ke khetoñ meñ ḳhvāb bone kī hasrateñ bhī na.ī nahīñ haiñ

āñkheñ taras rahī haiñ mirī terī zulf ko
taare chamak rahe haiñ shab-e-intizār ke

mashām-e-jāñ meñ ajab hai surūr kā aalam
tasavvurāt meñ zulf-e-dotā ko chhūte hī

Dasne ko mirā dil hai tirī zulf kī nāgin
tā.ūs-ḳhat us ko jo nigal jaa.e to achchhā

bikhrā dī vahīñ zulf zarā ruḳh se jo sarkī
kyā raat Dhale raat vo Dhalne nahīñ dete

jab shāna bhī karne na uThe haath hamārā
aur zulf sañvar jaa.e to lagtā hai ki tum ho

shamīm-e-zulf ho us kī to ho farhat mire dil ko
sabā hovegā mushk-chīñ kī ḳhushbūī se kyā hāsil

kisī āshiq ke shāne par bikhar jaa.e to kyā kahnā
magar is zulf ko zulf-e-pareshāñ ham nahīñ kahte

halqe nahīñ ye zulf meñ saaqī kī balki hai
vābasta mū-ba-mū se qadah aur qadah se ham

misl-e-zulf-e-butāñ fasāna-e-dil
hai tavīl iḳhtisār kyā kiije

daam hai vo are kamand hai vo
dekh zulf-e-siyāh par mat phuul

ishq-e-avval kī shab-e-dījūr meñ ai zindagī
zulf terī yā koī zanjīr ham dekhā kiye

dil ko us zulf-e-pareshāñ meñ giraftār hī rakh
phir bane yā na bane zulf-e-rasan mere ba.ad

koī apnā na huā silsila-jumbān-e-junūñ
ek fil-jumla usī zulf-e-dotā ne chāhā