Tags-Zulf

dil diyā tab ki bahut zulf-e-rasā ne chāhā
aap farmāte haiñ yuuñ us kī balā ne chāhā

zulf kī baat kiye jaate haiñ
din ko yuuñ raat kiye jaate haiñ

ai dil tirī jagah shikan-e-zulf meñ nahīñ
ḳhū bū tirī pasand na kāfir ko tū pasand

ai zulf-e-kā.enāt tujhe kyā ḳhabar ki ham
kin pech o ḳham se chhuT ke tire paas aa.e haiñ

ḳhānqāhoñ se ta.alluq hai na darbāroñ se
nisbat-e-silsila-e-zulf-e-butāñ rakhte haiñ

dīvānoñ ke sar ho ga.ī kiyā zulf-e-dotā aap
vo jā ke gale apne lagā laa.e bulā aap

kyūñkar in kaalī balāoñ se bachegā āshiq
ḳhat siyah ḳhaal siyah zulf siyah chashm siyāh

abas nahīñ hai ye vābasta-e-pareshānī
kisī kī zulf ko pahuñche hai silsila dil kā

uljheñge ek baar to zulf-e-dotā se ham
saudā.ī huuñ saḌī huuñ tumhārī balā se ham

zulf kī shaam sub.h chehre kī
yahī mausam janāb de diije

halqa-e-zulf-e-rasā us ke liye kaafī thā
tere dīvāne ko zanjīr kī hājat kyā thī

tīra-baḳhtī mirī kartī hai pareshāñ mujh ko
tohmat is zulf-e-siyah-fām pe dhar detī hai

dekhī thī zulf raat kisī kī maiñ ḳhvāb meñ
ab tak hai baal baal mirā pech-o-tāb meñ

rulā.e barsoñ hañsī tū jis se dikhā.e gar zulf maar rakkhe
kare tū dar-parda raah dil meñ jo dekhe parda uThā uThā kar

mashshātagi-e-ma.anā bahut ho chukī 'zafar'
kuchh roz ab ye zulf pareshāñ bhī chāhiye

gar tū sune to silsila-e-zulf ke asiir
sharh-e-niyāz-mandī-e-dil mū-ba-mū kareñ

chehre pe mire zulf ko phailāo kisī din
kyā roz garajte ho baras jaao kisī din

balā-e-zulf-e-mehmāñ se kahūñ kyā
nahīñ Taltī mire sar aa paḌī hai

sar-e-mahshar baḌhī hai kis qadar zulf
qayāmat kis qadar ochhī paḌī hai