Tags-Zulf

band-e-kākul meñ tire jī bhī hamārā hai asiir
daam meñ zulf ke dil hī na phañsāyā tanhā

tābīr-e-ḳhvāb zulf-e-musalsal thī kyā yahī
'ālim' jakaḌ ke maiñ jo salāsil meñ rah gayā

qaidī bhī haiñ is shaan ke āzād tumhāre
zanjīr kabhī zulf se bhārī nahīñ rakhte

luTtī hai qaid-e-zulf meñ kyā kyā bahār-e-husn
tah meñ asīrīyoñ kī haiñ kyā kyā rihā.iyāñ

aaj yuuñ mauj-dar-mauj ġham tham gayā is tarah ġham-zadoñ ko qarār aa gayā
jaise ḳhush-bū-e-zulf-e-bahār aa ga.ī jaise paiġhām-e-dīdār-e-yār aa gayā

jo dekhe saañp ke kaaTe kī lahr use aa.e
bharā hai zahr ab aisā bhī zulf-e-yār meñ kyā

dīdār-e-jānāñ kā bhalā kyuuñ kar tahammul ho sake
tirchhī nigāheñ ek sū zulf-e-chalīpā ik taraf

pech de zulf-e-ambarīñ na kahīñ
ḳhud ulajh jaao ai hasīñ na kahīñ

yaad meñ us ke ruḳh o zulf kī har aan 'nazīr'
roz-o-shab sumbul-o-raihāñ se kaho ishq allāh

vo qadam qadam pe laġhzish vo nigāh-e-mast saaqī
ye tarāsh-e-zulf-e-sarkash ye kulāh-e-kaj-nihādā

mahak rahī hai ġhazal zikr-e-zulf-e-ḳhūbāñ se
nasīm-e-sub.h kī mānind kū-ba-kū kahiye

zulf o ruḳh aaj bhī unvān-e-ġhazal haiñ 'manzūr'
ruḳh udhar gardish-e-ayyām kā moḌā jaa.e

rāt-din hai san.at-e-haq kis tarah badleñ sanam
rū-e-zebā kyā kare zulf-e-pareshāñ kyā kare

unhī kī aañkh kā rahtā hai tazkira aksar
unhī kī zulf ke qisse sunā.e jaate haiñ

zulf terī siiñ daad pā.ūñgā
haat aa.ī hai ab pareshānī

yūñhī ḳhushbū se mo.attar nahīñ sāñseñ merī
zulf lahrā.ī hai āñgan meñ kisī pyārī ne

vahī ek manzar-e-ḳhush-adā kahīñ naqsh meñ kahīñ rañg meñ
vahī us kī zulf ġhazal-numā vahī us kā chehra kitāb sā

shikan-e-zulf se dil saaf nazar aatā hai
is añdhere meñ ta.ajjub hai chhupāyā na gayā

is se pahle na ḳhabar thī mujhe merī mahbūb!
zulf ke ḳham meñ siyah maar chhupe hote haiñ