Tags-Zulf

kis se khulte haiñ tirī zulf-e-girah-gīr ke bal
koī āsān hai ye uqda-e-dil vā honā

lapaT vo zulf kī jāñ-baḳhsh aur vo pyārī raat
basar huī kabhī aisī bhī saarī saarī raat

Thahar jaatā huuñ tah-e-zulf-e-nigār-e-fardā
bār-e-imroz jo shānoñ pe garāñ hotā hai

uljhā hai paañv yaar kā zulf-e-darāz meñ
lo aap apne daam meñ sayyād aa gayā

dil-lagī meñ bhī to bigḌī hai bahut
baat ye zulf-e-rasā achchhī nahīñ

ab maiñ huuñ aur vo zulf hai yārān-e-be-vafā
dām-e-balā meñ mujh ko phañsā kar chale ga.e

hai zulf-e-musalsal tirī yā dām-e-balā hai
ho rahte haiñ do-chār giraftār hamesha

mas.ale kam nahīñ vaise hī sulajhne ke liye
aur tirī zulf kī uljhan bhī mujhe chāhiye hai

thī chhoTī us ke mukhḌe par kal zulf-e-musalsal aur tarah
phir dekhā aaj to us gul ke the kākul ke bal aur tarah

zulf-e-pur-ḳham havā se kyuuñ na hile
aap khāte haiñ pech-o-tāb abas

hai kis ke zulf kā saudā tujhe ai ishq batlā de
hamesha itr-e-ambar kī sī bū aatī hai tujh ḳhū meñ

khulte jaa.eñ jo tire band-e-qabā zulf ke saath
rañg-e-pairāhan-e-shab aur nikhartā jaa.e

chhīn legā bahr-e-zulf-e-ambarīñ
ye dil-e-sad-chāk rashk-e-shāna hai

paañv tak pahuñchī vo zulf-e-ḳham-ba-ḳham
sarv ko ab bāñdhiye āzād kyā

is tarah bhī ġhash se kahīñ hotā hai ifāqa
yā zulf suñghā yā mujhe dāman kī havā de

shabīh-e-zulf-e-pareshāñ jo ham banāne lage
ruke haiñ uljhe haiñ bigḌe haiñ yaar baiThe haiñ

saudā hai ye kis zulf kā is ko jo hamesha
dīvāna tirā pheñke hai zanjīr havā par

jab ki zulf us kī gale khā bal paḌī
lashkar-e-ushshāq meñ halchal paḌī

sulajhne se ulajhtī jā rahī huuñ
maiñ apnī zulf kā bal ho ga.ī huuñ

suntī hai roz naġhma-e-zanjīr-e-āshiqāñ
vo zulf bhī hai silsila-e-ahl-e-chisht meñ