Tags-Zulf

log jis ko nāg-o-nāgin kā fusūñ kahne lage
tum ne shāyad zulf lahrā.ī thī aur kuchh bhī nahīñ

mutma.in haiñ bahut aaj arbāb-e-fan apnā sarmāya-e-fikr-o-fan bech kar
jaise ā.īna rakh de koī māh-vash halqa-e-zulf kā bāñkpan bech kar

qissa-e-silsila-e-zulf na kahnā behtar
pech-dar-pech hai ḳhāmosh hī rahnā behtar

jo tirī zulf pe jā kar na khile phuul vo kyā
jo na uljhe tire dāman se vo kāñTā kyā hai

na sar-e-zulf milā balbe darāzī terī
rishta-tūl-e-amal kā bhī sirā paidā ho

ye nahīñ kahne kā 'joshish' hogā jo sāhib-e-dimāġh
zulf-e-yār o nāfa-e-tātār donoñ ek haiñ

suljhī na ek baar kahīñ zulf-e-zindagī
garche hazār baar sañvārā gayā mujhe

zulf khultī hai to uThtā hai dhuāñ
ābshār-e-chashm-e-tar ke ās-pās

raat detā hī rahā dil ko mire pech pe pech
bal jo vo shoḳh tirī zulf-e-girah-gīr meñ thā

zulf-e-shab-rañg kā hai aks ye paimāne meñ
yā parī koī ye shīshe meñ utar aa.ī hai

zulf-e-jānāñ pe tabī.at mirī lahrā.ī hai
saañp ke muñh meñ mujhe merī qazā laa.ī hai

tire ruḳhsār se be-tarah lipTī jaa.e hai zālim
jo kuchh kahiye to bal khā uljhatī hai zulf be-Dhañgī

nahīñ haiñ tere dām-e-zulf meñ dil
laTakte haiñ hazāroñ murġh par-band

ishq kā zahr us suuñ kyuuñ tere
naag tujh zulf kā jise chaTkā

muñh chāñd us pe zulf-e-rasā sar se paañv tak
kyuuñ loT-poT ho na adā sar se paañv tak

mubtalā huuñ tirā jab se sanam-e-kufr-farosh
zulf-e-tā-dosh na thī dosh pe zunnār na thā

yaañ talak merī giraftārī se vo ḳhush hai ki maiñ
zulf gar ban jā.ūñ to shāne meñ uljhā de mujhe

kartā huuñ terī zulf se dil kā mubādala
har-chand jāntā huuñ ye saudā burā nahīñ

shāḳh hunar se toḌ ke sher kā phuul maiñ us ko de duuñ
us kī zulf ko hai ma.alūm gulāb ko taaza rakhnā

tū ne kis lutf se chheḌā hai unheñ mauj-e-nasīm
jhuum kar zulf-e-siyah tā-ba-kamar aa.ī hai