Tags-Zulf

vo halqa-hā-e-zulf kamīñ meñ haiñ yā ḳhudā
rakh liijo mere dāva-e-vārastagī kī sharm

zulf-e-gul ro ke gale mil kar jo aa.egī 'nasīm'
hogī sumbul af.ī-e-ganj-e-shahīdān-e-bahār

tilism-e-zulf hifāzat kā piñjra ho jaise
maze jahān ke ho kar asiir khīñchtā huuñ

kuchh tujh ko ḳhabar hai ham kyā kyā ai shorish-e-daurāñ bhuul ga.e
vo zulf-e-pareshāñ bhuul ga.e vo dīda-e-giryāñ bhuul ga.e

nazar ko aa.ina dil ko tirā shāna banā deñge
tujhe ham kyā se kyā ai zulf-e-jānāna banā deñge

ham ne har uqda-e-dushvār kā muñh chuum liyā
kitne dilkash haiñ tirī zulf-e-girah-gīr ke ḳham

pareshāñ-rozgār āshufta-hālāñ kā muqaddar hai
ki us zulf-e-pareshāñ kī pareshānī nahīñ jaatī

zulf-e-shab-gūñ ruḳh-e-anvar kī satā.ish ko sivā
koī mazmūn na milā qābil-e-tahrīr mujhe

panja hai mirā panja-e-ḳhurshīd maiñ har sub.h
maiñ shāna-sifat sāya-e-rū zulf-e-butāñ huuñ

phir aa.ī zulf-e-musalsal kī lahr pesh-e-nazar
phir ik junūñ ke na.e silsile hue dil meñ

us zulf-e-kaj ke uqde hargiz khule na mujh par
kyuuñ us ko shāna kar ke ek ek baal denā

aañkh hai tark-e-zulf hai sayyād
dekheñ dil kā shikār kaun kare

hathkaḌī jaise lagāte haiñ asīroñ ko vo zulf
kar ke halqe meñ giraftār liye phirtī hai

jaise apne haath uThā kar ghaTā ko chhū lūñgā
lagtā hai ye zulf magar nazdīk nahīñ hotī

tū āftāb hai zulf-e-siyah nahīñ to na ho
charāġh-e-roz ko kuchh ehtiyāj-e-shām nahīñ

dil ko naaz hai suljhāv par lekin maiñ ne dekhā hai
suljhāne se aur uljhā hai terī zulf kā ik ik ḳham

kyā hue vo din ki jab aksar mayassar thī mujhe bhī
din ko zulmat zulf kī aur dhuup shab ko sīm-tan kī

ishq kī ātish kahāñ bārūd ke sho.ale haiñ raqsāñ
ab kahāñ vo zulf aur vo dāstāñ dār-o-rasan kī

zulf ke jaal meñ ma.ashūq kā sar hai ḳhud bhī
qaidiyoñ muzhda ki sayyād tah-e-dām aayā

na laT dhueñ kī hai aisī na zulf sumbul kī
jo baal sar ke tire pech-o-tāb rakhte haiñ