Tags-Zulf

abrū-o-chashm-o-zulf mizha kī to kahiye kyā
ham ko to tere muñh se tirā til aziiz hai

havas-e-zulf-e-girah-gīr liye baiThe haiñ
āyat-e-shauq kī tafsīr liye baiThe haiñ

har martaba Dasne ke irāde meñ hai vo zulf
azhdar ye agar mujh ko nigal jaa.e to achchhā

tā.ir-e-dil ko havā-e-ḳham-e-zulf-e-sayyād
sūrat-e-murġh-e-giraftār liye phirtī hai

saañp kahte haiñ zulf ko shā.ir
kaam karte haiñ muñh kuchalne kā

zulf ke kūche se ho gulshan meñ guzre hai sabā
aaj vaañ jā kar guloñ ko koī bū mat kījiyo

aañkh adab zulf tahzīb aariz suḳhan
aur tire lab mujhe shā.irī de ga.e

duur sahrā meñ koī zulf sī lahrā.ī hai
koī bādal sā uḌā hai mujhe tar karne ko

bikhrī rahī hai shab mire baazū pe zulf-e-yār
kartā rahā huuñ ġhāliya-sā.ī tamām raat

kholī jo Tuk ai ham-nashīñ us dil-rubā kī zulf kal
kyā kyā jatā.e ḳham ke ḳham kyā kyā dikhā.e bal ke bal

chhuḌā mashshāta zulf-e-yār ko shāne ke nīche se
ki us kī kashmakash se dil ko mere pech-o-tābī hai

zulf kuuñ vā kar ki shāh-e-ishq kuuñ
sāya-e-bāl-e-humā darkār hai

phirtā hai udhar zulf meñ shāna to idhar dil
ye duzd na laayā kabhū ḳhātir meñ asas ko

tasavvur meñ bhī pindār-e-vafā kā lutf hāsil thā
tumhārī zulf-e-qātil-e-pesha ke ḳham meñ fanā ho kar

kise dekhūñ kise āñkhoñ se lagā.ūñ ai dil
rū-e-tābāñ bhī nahīñ zulf-e-pareshāñ bhī nahīñ

vo lajā.e mere savāl par ki uThā sake na jhukā ke sar
uḌī zulf chehre pe is tarah ki shaboñ ke raaz machal ga.e

kuchh der kisī zulf ke saa.e meñ Thahar jaa.eñ
'qābil' ġham-e-daurāñ kī abhī dhuup kaḌī hai

kyā tirī zulf kyā tire abrū
har taraf suuñ mujhe kashākash hai

hamāre dil pe ye aafat na aatī ik sar-e-mū
pasand ham jo na vo zulf-e-mushkbū karte

nazar ulajhtī rahī ḳhāl-o-zulf se tā-der
samajh meñ aa gayā mafhūm-e-isti.āra-e-shab