Tags-Baam

jaao tum apne baam kī ḳhātir saarī laveñ sham.oñ kī katar lo
zaḳhm ke mehr-o-māh salāmat jashn-e-charāġhāñ tum se ziyāda

sub.h-dam jis ne uchhālā thā fazā meñ ḳhurshed
dil sar-e-shām usī baam pe Dhalnā chāhe

tumhārī yaad to lipTī hai puure ghar ke manzar se
darīche se zamīñ se baam se dīvār se dar se

va.ada thā hamīñ se lab-e-bām aane kā honā
saaye kī tarah se pas-e-dīvār hamīñ the

hai dil meñ ghar ko shahar se sahrā meñ le chaleñ
uThvā ke āñsuoñ se dar-o-bām dosh par

vo fikr thī ki dīda-o-dil muzmahil hue
vo gard thī ki ghar ke dar-o-bām aT ga.e

detā tumhārā nutq dahā.ī to fitratan
lauh-o-qalam ke baam se fankār bolte

fazā-e-qarya tilism-e-sukūt meñ gum-sum
siyāh raat ke dāman meñ bām-o-dar ḳhāmosh

ghar meñ jis ke liye rahtā thā vahī ab na rahā
ab mujhe ghar ke dar-o-bām se kuchh kaam nahīñ

dar-o-dīvār kyā kahte haiñ ghar kis ko bulātā hai
guzarte mausamoñ se bām-o-dar kī guftugū kyā hai

koī yahāñ se chal diyā raunaq-e-bām-o-dar nahīñ
dekh rahā huuñ ghar ko maiñ ghar hai magar vo ghar nahīñ

bām-o-dar ḳhāmushī ke bojh se chuur
āsmānoñ se jū-e-dard ravāñ

maiñ hāshiya huuñ tire jalva-zār-e-hairat kā
maiñ tere saath tire bām-o-dar meñ raushan huuñ

ik jhalak tum jo lab-e-bām dikhā jaate ho
dil pe ik kauñdtī bijlī sī girā jaate ho

le aa.ī chhat pe kyuuñ mujhe be-vaqt kī ghuTan
terī to ḳhair baam pe aane kī umr hai

dam se unhī ke apne dar-o-bām haiñ buland
mere vatan ke ḳhāk-nashīnoñ kī ḳhair ho

qanā.at umr-bhar kī ghar ke bām-o-dar pe rakkhī thī
maiñ zer-e-āsmāñ thā dhuup mere sar pe rakkhī thī

ab mujh pe khulā apne dar-o-bām kā afsūñ
yuuñ hai ki mire ghar kī ye tanhā.ī ajab hai

nashsha-e-hosh pe thī kam-nazarī kī tohmat
khul ga.ī aañkh to ab koī sar-e-bām nahīñ

mire zauq-e-dīd kā ho burā kahāñ jā ke señke koī nazar
na tajallī-e-sar-e-rah-guzar na tajallī-e-sar-e-bām hai