Tags-Baam

tamāshā nahīñ thā mirā iztirāb
koī kyuuñ ye bālā-e-bām aa gayā

mujh ko bhī jāgne kī aziyyat se de najāt
ai raat ab to ghar ke dar-o-bām so ga.e

ghar kī buniyādeñ dīvāreñ bām-o-dar the baabū jī
sab ko bāñdh ke rakhne vaalā ḳhaas hunar the baabū jī

jab bhī pardes meñ yaad aatā hai ghar kā naqsha
maiñ tasavvur meñ dar-o-bām pahan letā huuñ

kūcha-e-yār meñ apnā jo guzar hotā hai
nigarāñ rahte haiñ hasrat se dar-o-bām ko ham

zindagī Daal rahī thī jo sitāroñ pe kamand
ab tamāshā-e-lab-e-bām huī jaatī hai

ik apnī chīḳh se laraz uTThe the bām-o-dar
aa.ī na bāzgasht koī ham-navā na thaa!

bām-e-dar ke TūTne meñ hī kahīñ maujūd hai
ek imkāñ ḳhvāhish-e-ta.amīr meñ Duubā huā

suunā suunā āñgan hai aur bām-o-dar ḳhāmosh
kis se guftugū kiije ho jo ghar kā ghar ḳhāmosh

us ik diye se hue kis qadar diye raushan
vo ik diyā jo kabhī bām-o-dar meñ tanhā thā

ban ga.ī paañv kī zanjīr dar-o-bām kī yaad
ḳhud mirī raah kī dīvār mirā ghar niklā

ye udaas udaas se baam o dar ye ujaaḌ ujaaḌ sī rah-guzar
chalo ham nahīñ na sahī magar sar-e-kū-e-yār koī to ho

sharīf log chaḌhe jab nahīñ haiñ koThoñ par
to kis ke saath ye tahzīb baam par aa.ī

ek rashk-e-māh kā maiñ kar rahā huuñ tazkira
āsmāñ se kyuuñ na ho ūñchā mirā bām-e-ġhazal

abhī us ne aane kā va.ada kiyā hai
chamakne lage bām-o-dar rafta rafta

chalī haiñ daur-e-taraqqī kī āñdhiyāñ kyā kyā
sharāfatoñ ke dar-o-bām TuuTe jaate haiñ

havā ke dosh pe kis ke payām aate haiñ
hamāre ghar ke dar-o-bām mahke jaate haiñ

nik.hat-o-nūr-o-ziyā husn kī pahchān bane
ishq mansūb huā bām-e-ḳharābāt ke saath

Thahar ai mehr zarā sub.h-e-shab-e-vasl hai aaj
baam par dhuup chaḌhegī to maiñ Dhal jā.ūñgā

baam pe jaane vaale jāneñ us mahfil kī bāteñ
ham to Thahre us kūche meñ ḳhaak uḌāne vaale