Tags-Baam

ham insānoñ se to ye sañg-o-ḳhisht-e-bām-o-dar achchhe
musāfir kab huā ghar se ravāna yaad rakhte haiñ

tum sar-e-bām aa kar
uThāyā huā haath apnā hilā kar

zarā bhī farq na paḌtā makāñ badalne se
vo bām-o-dar vo darīcha badal ke aayā huuñ

ai sāhab-e-urūj tū bām-e-urūj se
sūraj ke Dūbne kā nazārā na kījiyo

māñge hai phir kisī ko lab-e-bām par havas
zulf-e-siyāh ruḳh pe pareshāñ kiye hue

sīnā-chākān-e-mohabbat ko ḳhabar hai ki nahīñ
shahr-e-ḳhūbāñ ke dar-o-bām sadā dete haiñ

sar pe rahtā hai hamesha hī kisī kā saayā
merī dīvār pe ye baam kisī aur kā hai

chāñd nikle to sahī baam pe kuchh shor to ho
kuchh zarūrī to nahīñ hai mah-e-kāmil honā

be-farsh-o-bām silsila-e-kā.enāt ke
is be-sutūñ nizām meñ tū bhī hai maiñ bhī huuñ

judā thī baam se dīvār dar akelā thā
makīñ the ḳhud meñ magan aur ghar akelā thā

bām-e-urūj par bhī kabhī ā.ūñgā zarūr
ham-dam mirā zavāl faqat chaar din kā hai

bām-e-ḳhayāl-e-yār se utre to ye khulā
ham se hamāre shām-o-sahar kitnī duur haiñ

vo bastiyāñ vo baam vo dar kitnī duur haiñ
mahtāb tere chāñd-nagar kitnī duur haiñ

jis kī sāñsoñ se mahakte the dar-o-bām tire
ai makāñ bol kahāñ ab vo makīñ rahtā hai

tirī raah dekhtī haiñ mirī tishna-kām āñkheñ
tire jalve mere ghar ke dar-o-bām chāhte haiñ

kal saath thā koī to dar o baam the raushan
tanhā huuñ 'vasīm' aaj to ghar kaaT rahā hai

tez-tar bād-e-ḳhud-sar chalī to yahāñ kaun sī lū ghaTī
maiñ ne aur ik lahū se jalā kar diyā baam par rakh diyā

mahfūz kar na pā.eñge dīvār-o-bām-o-dar
merī fuġhāñ huī ki vo terī hañsī huī

ġhazab kī dhuup hai aur sā.ebān koī nahīñ
maiñ jal rahā huuñ mire bām-o-dar kahāñ ho tum

suune kitne baam hue kitne āñgan be-nūr hue
chāñd se chehre yaad aate haiñ chāñd nikalte vaqt bahut