Tags-Baam

chand dīvānoñ se raushan thī galī ulfat kī
varna fānūs to lākhoñ hī sar-e-bām aa.e

fasīl-e-jāñ pe rakkhī thī na bām-o-dar pe rakkhī thī
zamāne bhar kī be-ḳhvābī mire bistar pe rakkhī thī

havā ke zor se pindār-e-bām-o-dar bhī gayā
charāġh ko jo bachāte the un kā ghar bhī gayā

na aayā koī lab-e-bām shaam Dhalne lagī
vufūr-e-shauq se āñkhoñ meñ ḳhuun aa bhī gayā

ai kaash hamārī qismat meñ aisī bhī koī shaam aa jaa.e
ik chāñd falak par niklā ho ik chāñd sar-e-bām aa jaa.e

aao ḳhalvat-sarā-e-haram chhoḌ kar
bām-o-dar so ga.e pāsbāñ so gayā

'sahar' tum us se mulāqāt kaise karte ho
vo shaḳhs ab to lab-e-bām bhī nahīñ hotā

koī bhī sajnī kisī bhī sājan kī muntazir hai na muztarib hai
tamām baam aur dar bujhe haiñ kahīñ bhī raushan diyā nahīñ hai

ne ġhurfe se jhāñkā na kabhī baam par aa.e
pinhāñ rahe tum husn-e-dil-ārā ke dinoñ meñ

ai 'zafar' charḳh pe ḳhurshīd jo yuuñ kāñpe hai
jalva-gar aaj kahīñ yaar lab-e-bām na ho

ishq kartā hai to kar aur nigāhoñ ko buland
rishta-e-rah-guzar-o-bām meñ kyā rakkhā hai

vīrāñ vīrāñ bām-o-dar maiñ aur mirī tanhā.ī
tārīkī meñ Duubā ghar maiñ aur mirī tanhā.ī

is tāza-dam havā meñ mire māh-e-nīm-māh
us baam se judā na kabhī ho tulū-e-shab

na pahuñche bām-e-qafas tak kabhī mire naale
vo barq hogī jise gard-e-āshiyāñ dekhā

bām-e-falak pe gar vo uḌātā nahīñ patañg
ḳhurshīd o maah Dor ke phir kis kī gole haiñ

jahāñ se dil kī taraf zindagī utartī thī
nigāh ab bhī usī baam par jamī huī hai

utar ke baam se aayā hai mere āñgan meñ
'qamar' maiñ dekhūñ vo kaisā dikhā.ī detā hai

kuchh aur baḌh ga.ī bārish meñ bebasī apnī
na baam se na kisī kī galī se guzrā huuñ

aa base kitne na.e log makān-e-jāñ meñ
bām-o-dar par hai magar naam usī kā likkhā

ye baḌā chāñd chamaktā huā chehra khole
baiThā rahtā hai sar-e-bām-e-shabistāñ shab ko