Tags-Baam

kamāl-e-shauq-e-nazzāra meñ uryāñ hotā jaatā hai
sar-e-bām-e-falak vo māhtāb āhista āhista

judā thī baam se dīvār dar akelā thā
makīñ the ḳhud meñ magan aur ghar akelā thā

tāqat-e-nazzāra jab minnat-pazīr-e-hosh ho
bahr-jalva phir koī bālā-e-bām aayā to kyā

dar-o-dīvār o saqf-o-bām sab apnī jagah par the
to phir kyā baat thī jis ke sabab be-ghar rahā huuñ maiñ

zalzaloñ ne kiyā yuuñ shahr ko mismār ki bas
chīḳh uThe ḳhauf se bām-o-dar-o-dīvār ki bas

az-bahr-e-ḳhudā baam par aa ai but-e-kāfir
kūche meñ tire tālib-e-dīdār khaḌe haiñ

vahī sunsān fazā.eñ vahī vīrāñ sā nagar
aa ke baiTho to dar-o-bām se jī Dartā hai

nafrat huī do-rañgī-e-lail-o-nahār se
maiñ sub.h-o-shām us ko lab-e-bām le gayā

e.ajāz maiñ ne raj.at-e-ḳhurshīd kā kiyā
bālā-e-bām us ko sar-e-shām le gayā

kyuuñ baam pe āvāzoñ kā dhammāl hai 'ajmal'
is ghar pe to aaseb kā saaya bhī nahīñ hai

us chāñd kī añgḌā.ī se raushan haiñ dar o baam
jo parda-e-shab-rañg pe ubhrā bhī nahīñ hai

dhuāñ bharā hai makāñ meñ sulagte haiñ dar-o-bām
makīñ to aañkh bhī maltā nazar nahīñ aatā

mujhe batāo maiñ kyuuñ na is uThtī dhuul ke saath baiTh jā.ūñ
mujhe ḳhabar hai vo aa.egā baam par bahut der ba.ad jā kar

kal shaam lab-e-bām jo vo jalva-numā thā
kis shauq se maiñ duur khaḌā dekh rahā thā

be-ḳhatar kuud paḌā ātish-e-namrūd meñ ishq
aql hai mahv-e-tamāshā-e-lab-e-bām abhī

ai nasīm-e-saharī saath liye jā sū-e-bām
nafas-e-radd hai naala nahīñ fariyād nahīñ

ai jān-e-jāñ tire mizāj kā falak bhī ḳhuub hai
thake thake se baam par hasīñ dhanak bhī ḳhuub hai

jab safar se lauT kar aa.e to kitnā dukh huā
is purāne baam par vo sūrat-e-zebā na thī

chalte hī tire baam pe aayā hai vo kāfir
kyuuñ itne qadam jald uThātā hai khaḌā ho

bālā-e-bām ġhair hai meñ āstān par
chāheñ jise chaḌhā.eñ huzūr āsmān par