Tags-Badan

tire badan kī mahak ne sulā diyā thā magar
havā kā andhā musāfir chalā anokhī chaal

badan ḳhud ho rahā hai merā zaḳhmī
maiñ kis par sañg-bārī kar rahā huuñ

mo.attar hai badan ḳhushbū se merā
guloñ kī ābiyārī kar rahā huuñ

zabt-e-fuġhāñ se uzv-e-badan ghul chale tamām
maiñ kārvān-e-reg-e-ravāñ huuñ jaras nahīñ

maiñ hāsil ho chukā huuñ jis badan ko
usī se pūchhtā huuñ kyā milā hai

in galī-kūchoñ pe ye vaqt bhī aayā 'manzar'
shahar vāloñ ke badan ḳhuun meñ tar dekhe haiñ

baḌhtā rahā badan meñ mire dam-ba-dam lahū
siine pe thā vo dast-e-hinā.ī tamām raat

be-ābrū hai fan abhī āvāz be-badan
sar par abhī hai hijr kā bādal khaḌā huā

ai raat mujhe maañ kī tarah god meñ le le
din bhar kī mashaqqat se badan TuuT rahā hai

na badan bachā na lahū bachā na to jism kā koī mū bachā
koī jā ke kah de ye dard se vo tire shikār chale ga.e

hai ye sach ki mausam-e-hijr meñ mirā ḳhaar ḳhaar badan huā
kabhī yaad tujh ko jo kar liyā to badan ke ḳhaar chale ga.e

rāste meñ nā-murādoñ ne añdherā kar diyā
ik badan ke saath kuchh sāyoñ ko chaltā dekh kar

badan par kuchh mire zāhir nahīñ aur dil meñ sozish hai
ḳhudā jaane ye kis ne raakh andar aag daabī hai

badan se jaañ nikalnā chāhtī hai
balā us ghar se Talnā chāhtī hai

ye tirī bazm-e-badan yuuñ to nahīñ chal saktī
ek shab ko hī sahī is kī nizāmat mujhe de

jise talāsh hai ḳhush-rañg ābshāroñ kī
vo zaḳhm zaḳhm badan le ke ghar bhī aatā hai

tire badan meñ dhaḌakne lagā huuñ dil kī tarah
ye aur baat ki ab bhī tujhe sunā.ī na duuñ

simaTtā sher hai.at meñ
badan kī sī ye gadrāhaT

vo ek shor sā zindāñ meñ raat bhar kyā thā
mujhe ḳhud apne badan meñ kisī kā Dar kyā thā

bajā ki ab baal to siyah haiñ magar badan meñ sakat nahīñ hai
shabāb laayā ḳhizāb lekin ḳhizāb laayā shabāb aadhā