Tags-Badan

tamannā meñ bose kī kahtā hai jī
badan se nikal bhī agar jā.eñge

usī ḳharābe meñ rahne kī Thaan baiThī hai
badan kā dasht nahīñ paar karne vaalī havā

jhulas rahā hai badan zer-e-sāya-e-dīvār
bulā rahā hai koī dasht-e-be-shajar mujh ko

āñkhoñ meñ raushnī kā samundar umaD paḌā
jaise hī us badan ko nikālā ġhilāf se

le ke pahuñchī hai kahāñ sīm-badan kī ḳhvāhish
kuchh ilāqa na rahā sūd-o-ziyāñ se aage

jalā liyā hai badan apnī aag meñ maiñ ne
bujhā na is ko abhī ye azaab rahne de

zarā Thahar ki abhī ḳhuun meñ samā.ī nahīñ
mire qarīb badan kī sharāb rahne de

tabāh ḳhud ko maiñ kar luuñ badan ko chhū ke tire
tū apne lams kā mujh par azaab rahne de

tire badan ke gulistāñ kī yaad aatī hai
ḳhud apnī zaat ke sahrā ko paar karte hue

badan ik din chhuā thā tum ne merā
usī din se bahut mahkā huā huuñ

abhī kuchh thā abhī kuchh hai badan āb-e-ravāñ sā
badan se āj-kal kā vāqi.a kyuuñ māñgte ho

bedār ho na jaa.eñ badan kī zarūrateñ
ai shauq-e-be-panāh fasīl-e-hayā na toḌ

badan meñ dil thā muallaq ḳhalā meñ nazreñ thiiñ
magar kahīñ kahīñ siine meñ dard zinda thā

use bhī os meñ Duubā huā lagā thā badan
mujhe bhī kuchh huā mahsūs raat aisā hī

ruuh aur badan donoñ daaġh daaġh haiñ yaaro
phir bhī apne bām-o-dar be-charāġh haiñ yaaro

matā-e-jāñ bhī usī pe vaarī usī ke dam se hai saañs jaarī
mire badan meñ vo ḳhushbuoñ kī havā basā kar chalā gayā hai

bahut nāzuk badan hai shā.irī kā
ki jaise gul uThāyā hai kisī ne

haq-goī ham-rikāb darīda-badan ke baab
karbal kitāb sidq siyāq-o-sabāq hai

nīche kahīñ badan meñ miTī ḳhvāhishoñ ke ḳhvāb
uupar darāzī-e-ġham-e-daurāñ kī ḳhaak hai

ātish-fishāñ zabāñ hī nahīñ thī badan bhī thā
dariyā jo munjamid hai kabhī maujzan bhī thā