Tags-Badan

dikhā ke ham ko hamārā hī qaash qaash badan
dilāse dete haiñ dekho to qātilāñ kyā kyā

phir rūheñ zaḳhmī zaḳhmī haiñ phir koḌh se dukhne aa.e badan
yuuñ lagtā hai ki shafā.at ko phir koī gvālā aa.egā

badan ke dasht meñ jab dafn ho gayā ehsās
vafā phaTaktī bhalā kaise aadmī ke qarīb

tirī badan meñ mere ḳhvāb muskurāte haiñ
dikhā kabhī mere ḳhvāboñ kā ā.īna mujh ko

nazar phisalte hī vallāh merī āñkhoñ meñ ḳhaak
ki saaf saaf hai ā.īne sā badan kyā ḳhuub

paañv tere rāste tere safar terā magar
kyuuñ pasīne meñ badan phir tar-ba-tar merā bhī hai

ab aur intizār kar ai khokhle badan
maiñ aa rahā huuñ madd-e-muqābil pachhāḌ ke

razā us kī to phir chubhtā huā ye neshtar kyā hai
badan kyuuñ hai hisār-e-ḳhauf meñ āñkhoñ meñ Dar kyā hai

phūloñ se ladī Tahniyāñ phailā.e haiñ bāñheñ
ḳhushbū kā badan ḳhaak meñ pāmāl paḌā hai

ajnabī lams-e-badan kī reñgtī haiñ chyūñTiyāñ
kuchh nahīñ hai sā.at-e-mauj-e-ravāñ hai aur bas

ajab andāz hai us gul-badan ke pyaar karne kā
mujhe pātāl tak le jā ke mahv-e-ḳhvāb kar degā

badan meñ zahr kai mānind phail jaatī hai
diloñ meñ ḳhauf se sahmī hui koī koī baat

vo muvahhid huuñ na rakkhā dūsre se ittihād
ruuh ne chhoḌā badan ko zidd-e-vahdat dekh kar

ab aa ga.e ho to phir umr bhar yahīñ Thahro
badan se koī bhī rasta nahīñ nikalne kā

magar giraft meñ aatā nahīñ badan us kā
ḳhayāl DhūñDhtā rahtā hai isti.āra koī

chhalkī har mauj-e-badan se husn kī dariyā-dilī
bul-havas kam-zarf do chullū meñ matvāle hue

mire badan meñ koī bhar de barf ke TukḌe
ki aañch aatī hai rātoñ ko kahkashāñ se mujhe

vo lāla-badan jhiil meñ utrā nahīñ varna
sho.ale mutavātir isī paanī se nikalte

vo badan ḳhvāb sā lagtā hai mujhe
jo kisī ne bhī na dekhā hogā

shab-e-visāl us kā surḳh āñchal musallā kar ke
badan-vazīfe kā vird jaarī rakhā huā hai