Tags-Badan

sabhī tālāb phūloñ aur kirnoñ se bharā thā
badan ḳhush-rañg paanī se nikhāre jā rahe the

vo kyā samajh sakegā mire ishq kā maqām
jo ruuh ke safar meñ badan kā sharīk thā

kis shola-badan kī yaad aa.ī
dāmān-e-ḳhayāl jal uThā hai

hiddat-e-jazbāt se jalne lagā thā tan-badan
phir thapak kar in sharāroñ ko sulānā paḌ gayā

guloñ kā rañg ab zard ho gayā hai
chaman meñ dekh kar terā badan surḳh

ik aag ġham-e-tanhā.ī kī jo saare badan meñ phail ga.ī
jab jism hī saarā jaltā ho phir dāman-e-dil ko bachā.eñ kyā

lahū meñ tairtā phirtā hai merā ḳhasta badan
maiñ Duub jā.ūñ to zaḳhmoñ ko dekhe-bhāle kaun

apne badan kī qaid se lekin chhuTkārā nā-mumkin hai
bāhar kī saarī dīvāreñ toḌ chukā huuñ vaise to

pūchhe mire masīhā-nafas se koī 'na.īm'
tāq-e-badan meñ zaḳhm kahāñ tak jale raheñ

pairahan meñ yuuñ badan hai jis tarah se tan meñ ruuh
chashm-e-bad duur ab latāfat meñ vo jism-o-jāñ hai ek

ye kaise malbe ke nīche dabā diyā gayā huuñ
mujhe badan se nikālo maiñ tañg aa gayā huuñ

apne badan ke saath rahūñ to azaab hai
mar jā.ūñgā maiñ jā.ūñ agar is ko chhoḌ kar

badan kī aag ne lafzoñ ko phir se zinda kiyā
hurūf sabz hue barf ke pighalte hī

ye raat aur ye Dastī huī sī tanhā.ī
lahū kā saaz 'qamar' tan-badan meñ bajtā hai

ajiib chiiz hai ye ḳhūbi-e-ḳhutūt-e-badan
koī libās ho us ke badan pe sajtā hai

kis tarah manzileñ tai hoñgī badan kī ai dil
us se miltā huuñ to dīvār lage hai vo bhī

laao haath apnā laao zarā
chhū ke merā badan

vo shor-e-husn thā dam-e-nazzāra-e-jamāl
ham sun sake na apne badan kī pukār bhī

tire payām hī se surḳh ho gayā hai badan
ki meñh paḌā nahīñ hai khil uThe kañval pahle

mujhe jamāl-e-badan kā hai e'tirāf magar
maiñ kyā karūñ ki varā-e-badan bhī dekhtā huuñ